2. flokkur áfram í bikarnum

Lið Keflavikur/Njarðvíkur í 2. flokki er komið í 8 liða úrslit bikarkeppninnar eftir 3-1 sigur á Fylki/Elliða á Njarðtaksvellinum.  Það voru A-in þrjú, þeir Aron Freyr Róbertsson, Ari Steinn Guðmundsson og Ari Már Andrésson sem skoruðu fyrir okkar lið.  Í næstu umferð mætir okkar lið annað hvort KA eða liði Aftureldingar/Hvíta riddarans á útivelli.  Sá leikur fer fram 18. júlí.

Strákarnir léku einnig í Íslandsmótinu í vikunni og þar tapaði A-liðið 1-3 fyrir Fram í hörkuleik.  Það var Róbert Freyr Samaniego sem skoraði fyrir Keflavík/Njarðvík.

Það gekk betur hjá B-liðinu sem vann góðan útisigur á Gróttu, 3-0.  Óðinn Jóhannsson gerði tvö mörk í þeim leik og Birkir Freyr Birkisson eitt.

Næstu leikir 2. flokks verða mánudaginn 7. júlí en þá leika A- og B-liðið gegn sameiginlegu liði Selfoss, Hamars, Ægis og Árborgar.  Leikirnir verða á Iðavöllum en A-liðið hefur leik kl. 18:00 og B-liðið kl. 20:00.  Bæði lið eru í toppbaráttu í sínum deildum.