Á Spáni...

Strákanir í meistaraflokki eru nú staddir í æfinga- og keppnisferð á Isla Canela á Spáni.  Haldið var út á laugardaginn og kom hópurinn á hótelið seint um kvöldið.  Þó var farið snemma á fætur á sunnudeginum, fyrsta æfingin hófst kl. 9:30 og var létt yfir mönnum.  Síðan skruppu menn í sund eða göngutúr um nágrennið.  Kl. 16:00 var síðan önnur æfing og þá var tekið hressilega á því.

Buddy Farah kom til liðs við hópinn á Spáni og tók vin sinn með.  Hins vegar skilaði farangur þeirra félaga sér ekki á áfangastað og er enn ekki kominn í leitirnar.  Hótelið sem liðið gistir á er hið glæsilegasta og morgun- og kvöldverðarhlaðborðin hafa vakið mikla hrifningu.  Nema hjá þjálfurunum sem sjá fram á hörkuvinnu við að koma í veg fyrir að menn komi nokkrum kílóum þyngri heim!  Smá meiðsli hafa komið upp í hópnum og í dag verða þeir Bói og Tóti á skokkinu.  Miles er líka tæpur og á að senda hann á skokkið þangað til betur kemur á ljós hvernig staðan er hjá honum.  Þessir strákar eru auðvitað í góðum höndum hjá Önnu Pálu sjúkraþjálfara.  Ekki verður slegið slöku við í dag og síðustu fréttir frá Spáni voru að þar hefst æfing kl. 9:30.  Við segjum fleiri fréttir af liðinu um leið þær berast úr sólinni.

Það var heitt í Lúxemborg í fyrra og vonandi
verður ekki alveg svona heitt á mönnum á Spáni.