Af Geoff og Buddy

Nú er að koma endanleg mynd á hópinn okkar.  Geoff Miles kemur á föstudaginn en hér má sjá hvar hann spilaði í USA áður en hann kom til Íslands.  Þess má geta að liðið hjá University of Missouri - Kansas City sem hann spilaði með er kennt við kengúrur.  Hann spilaði með Haukum síðasta sumar en sögur herma að Grindvíkingar hafi haft augastað á honum eftir mót í fyrra.  Miles er varnarmaður.  Verið er að gera íbúðina hans klára, en hann kemur til með að búa mitt á milli Reykjaneshallarinnar og fótboltavallarins, svo ekki ætti hann að villast í bænum.  Því miður hef ég ekki séð hann á vellinum ennþá en ég seldi honum úr í fyrra þegar hann spilaði með Haukum, svo mér verður eflaust kennt um það ef hann mætir of seint á æfingar...
 
Fljótlega fer liðið í æfingaferð til Spánar en þar bætist Buddy Farah við.  Eftir því sem ég best veit þá eru foreldrar Buddy frá Libíu en hann hefur alla tíð búið í Ástralíu.  Svo við erum að fá tvo leikmenn sem tengjast eitthvað kengúrum.  Buddy hefur verið fastur maður í landsliði Líbíu en þeir eru númer 84 á heimslistanum og féllu um fjögur sæti á nýjasta listanum.  Þess má geta að Ísland er númer 97 á sama lista.  Okkur sárvantar íbúð fyrir Buddy svo ef einhver sem les þetta lumar á einni íbúð þá endilega hafið samband við félagið, eða undirritaðan.  Buddy er búinn að gera 3ja ára samning við okkur svo hann kemur til með að vera hér í góðan tíma. 
 
Áfram Keflavík
Rúnar I. Hannah

Mynd: Svona leit Geoff út þegar hann spilaði með Kengúrunum í háskóla.