Af landsliðum og úrvalsliðum

Hólmar Örn Rúnarsson er í landsliðshópi Íslands sem leikur vináttulandsleik gegn Aserbajdan þann 20. ágúst.  Þetta er skemmtileg viðurkenning fyrir Hólmar sem hefur verið að leika geysivel með Keflavík í sumar en hann hefur einu sinni verið varamaður í A-landsleik án þess að koma inn á.  Sama dag leikur U-21 árs landsliðið vináttuleik við Dani og þar er Hallgrímur Jónasson okkar fulltrúi en hann hefur verið fastamaður í liðinu undanfarin misseri. 

Hólmar Örn kom líka við sögu þegar KSÍ og Landsbankinn veittu viðurkenningar fyrir 8.-14. umferð Landsbankadeildarinnar.  Hann var þar í úrvalsliði umferðanna ásamt Guðjóni Árna Antoníussyni.  Þeir piltar eru vel að þeirri viðurkenningu komnir en Guðjón var einnig í úrvalsliði fyrstu sjö umferða deildarinnar.

Við óskum okkar mönnum til hamingju með árangurinn og óskum þeim og félögum þeirra í landsliðunum góðs gengis í leikjunum framundan.

Hólmar Örn er í öllum liðum þessa dagana.
(Mynd: Jón Örvar)