Af úrslitaleik 3. flokks

Þá er úrslitaleik Faxaflóamótsins í 3. flokki á milli Keflavík 2 og GRV lokið með sigri GRV 4-0.  Keflavík byrjaði leikinn nokkuð vel og voru betri aðilinn fyrsta hálftímann án þess að skapa sér veruleg færi.  Þær hefðu þó getað sett inn eitt mark.  Á þessum tíma var vörnin að spila glimrandi vel en að lokum gaf einbeitingin eftir og heimamenn náðu að skora og bættu við öðru fyrir hlé, staðan 2-0 heimastúlkum í vil.  Í seinni hálfleik fór þreytan að segja til sín.  Rok og rigning, völlurinn blautur og háll.  Stelpurnar voru greinilega ekki vanar svona veðráttu enda ekki fengið að stiga á grasblett til æfinga það sem af er sumri.  En um miðjan seinni hálfleik tókum við áhættu og fórum framar a völlinn og settum fjórar í framlínuna á kostnað varnarinnar.  Enda breytti engu hversu stórt tapið yrði ef við töpuðum á annað borð, við urðum að skora.  Þetta gekk ekki eftir og úr tveimur skyndisóknum náðu heimastúlkur að bæta við tveimur mörkum, lokastaðan 4-0.  Þrátt fyrir þetta tap er svo sannarlega vel hægt að hrósa stelpunum fyrir sinn leik, baráttan var virkilega góð og allar gáfu sitt að fullu í leikinn.  Að lokum óskum við GRV til hamingju með Faxaflóameistartitilinn.

Lið Keflavíkur í þessum leik var skipað: Zohara, Jóna, Kristín, Matthildur, Laufey, Anna Rún, Fanney, Bagga, Helena Rós, Andrea, Guðrún Ólöf, Ólína Ýr, Sveindís, Berta.  Allar tóku þátt í leiknum.