Bikarmeistarar!

Það var sannkallaður Keflavíkurdagur í dag þegar leikið var til úrslita í VISA-bikar karla.  Keflavíkurliðið átti leikinn, Keflvíkingar áttu stúkuna og allt að því keflvísk veðurblíða lék við gesti í Laugardalnum.  Niðurstaðan var 2-0 sigur á KR-ingum og fjórði bikarmeistaratitill Keflavíkur í höfn.  Það er óhætt að segja að það hafi verið sterk liðsheild sem skóp sigurinn.  Strákarnir okkar léku frábæra knattspyrnu inn á vellinum.  Þjálfararnir lögðu leikinn rétt upp og þeir og liðsstjórnin stýrðu okkar mönnum af öryggi.  Og síðast en ekki síst fjölmenntu Keflvíkingar á leikinn og veittu liðinu ómetanlegan stuðning.

Leikjum sumarsins er þá lokið og niðurstaðan er frábær.  Fjórða sætið í Landsbankadeildinni, bikarinn til Keflavíkur og sæti í UEFA-keppninni næsta sumar.  Og þá er ekkert eftir nema að fagna!

Bikarmeistarar 2006, Keflavík.
(Mynd frá Víkurfréttum)