Breiðablik og Fjölnir, úti og heima

Á dögunum var dregið í VISA-bikar karla og kvenna.  Keflavík mætir Breiðablik í 8 liða úrslitum karla og stelpurnar fá heimaleik gegn Fjölnir í undanúrslitum.  Það er von á hörkuleikjum hjá báðum liðunum okkar.  Keflavík og Breiðablik hafa bæði verið að spila skemmtilegan fótbolta í Landsbankadeildinni og gerðu 2-2 jafntefli í fjörugum leik fyrr í sumar.  Aðeins munar einu stigi á Keflavík og Fjölni í Landsbankadeild kvenna þar sem okkar stelpur eru í 3. sæti en Fjölnisstúlkur í því fjórða.  Liðin léku á dögunum á heimavelli Fjölnis og þá sigruðu gestgjaranir 1-0 í hörkuleik.

Stelpurnar eru væntanlega ánægðar með að hafa fengið heimaleik gegn Fjölni en áður höfðu þær leikið fimm útileiki í röð í bikarkeppninni.  Þær léku síðast á heimavelli 10. júní 2005 þegar þær sigruðu Grindavík 8-1.  Síðan hefur liðið leikið á útivelli gegn Breiðablik (1-3), Þór/KA (4-0), Breiðablik (0-2), HK/Víking (1-0), Fylki (7-6 eftir vítaspyrnukeppni) og Aftureldingu (2-1).

Karlaliðið var ekki svo heppið að fá heimaleik í bikarnum en þeir ættu að vera orðnir vanir því.  Leikurinn gegn Breiðablik verður 16. útileikur liðsins í röð í bikarkeppninni sem hlýtur að nálgast það að vera heimsmet.  Liðið lék síðast heimaleik í bikarnum 3. júlí 2002 og vann þá U-23 ára lið ÍA 13-12 í vítaspyrnukeppni eftir að leiknum lauk með 3-3 jafntefli.  Síðan hefur liðið aðeins leikið á útivelli í keppninni en þó orðið bikarmeistari árin 2004 og 2006.  Bæði árin voru undanúrslita- og úrslitaleikirnir leiknir á Laugardalsvelli en í öll fjögur skiptin var Keflavík dregið sem útiliðið.

Hér má sjá yfirlit yfir þessa útileiki sem við höfum spilað í bikarkeppninni undanfarin ár.