Dregið í InterToto-keppninni

Í morgun var dregið í InterToto-keppninni en eins og flestir vita tökum við þátt í keppninni í sumar.  Enn er ekki orðið endanlega ljóst hvaða lið leika í keppninni enda lýkur flestum deildum í Evrópu ekki fyrr en í vor.  Í drættinum var löndunum því raðað saman.  Alls taka 49 lið þátt í keppninni og leika í þremur umferðum.  Ellefu lið komast áfram úr 3. umferðinni og fara inn í UEFA-keppnina.  Leikið er heima og heiman í hverri umferð. 

Í 1. umferðinni lendum við á móti liði frá Norður-Írlandi.   Miðað við stöðuna í deildinni þar eru það Dungannon, Cliftonville og Ballymena sem berjast um það sæti.  Fyrri leikirnir í 1. umferð verða 17.-18. júní en þeir síðari 24.-25. júní.  Komist Keflavík áfram í 2. umferð verða andstæðingar okkar norska liðið Lilleström.  Það lið er kunnuglegt enda hafa fjölmargir íslenskir leikmenn leikið með því í gegnum árin, m.a. Rúnar Kristinsson, Ríkharður Daðason, Gylfi Einarsson og Heiðar Helguson.  Næsta skref þar á eftir er síðan 3. umferðin og þá tekur við lið frá Englandi.  Eins og stendur er það Bolton sem situr í InterToto-sæti þar í landi en það er aldrei að vita nema stórlið eins og Arsenal endi í keppninni.

Það er því spennandi keppni framundan, leikið verður á Keflavíkurvelli og með góðum stuðningi eiga okkar strákar fína möguleika á að gera góða hluti í keppninni.