Enn slakt heima og ÍA tók 3. sætið
Keflavík bætti ekki í fátæklegt safn stiga sem hafa unnist á heimvelli í sumar þegar Skagamenn komu í heimsókn í gærkvöldi. Okkar menn virkuðu þungir og stemmningslausir meðan Skagamenn börðust og voru á undan í flesta bolta. Niðurstaðan varð 1-0 sigur gestanna sem eru þar með komnir í 3. sæti Landsbankadeildarinnar en Keflavík situr eftir í 4. sæti.
Það skiptust bókstaflega á skin og skúrir á Keflavíkurvelli í gær því um leið og flautað var til leiksloka skall á feiknamikill skúr sem rennbleytti völlinn og leikmenn sem virkuðu enda heldur þungir á upphafi leiks. Skagamenn voru ákveðnari í leiknum, börðust vel og beittu hröðum sóknum. Okkar mönnum voru mislagðar fætur, náðu sjaldan upp spili og það er óhætt að segja að neistann hafi vantað í leik liðsins. Vörnin stóð sig reyndar vel og gaf fá færi á sér en mönnum gekk illa að spila boltanum frá sér. Þó fengum við nokkur þokkaleg færi en Keflvíkingurinn í marka gestanna sá við þeim öllum. Sigurmark Skagamanna kom síðan stundarfjórðungi fyrir leikslok eftir skyndisókn. Dean Martin gaf góða sendingu fyrir markið þar sem Sigurður Ragnar Eyjólfsson skallaði boltann fallega í netið án þess að Ómar ætti möguleika á að verja.
Með sigrinum í gær tóku Skagamenn 3. sætið í deildinni og eru nú með 23 stig en Keflavík er með 21 stig í 4. sæti. Það er því enn barátta framundan um þetta eftirsótta 3. sæti. Tapið er ekki gott veganesti fyrir Evrópuleikinn gegn Mainz á fimmtudaginn en það er nokkuð ljóst að menn munu þjappa sér saman og mæta grimmir til leiks á Laugardalsvellinum.
Keflavíkurvöllur, 21. ágúst 2005
Keflavík 0
ÍA 1 (Sigurður Ragnar Eyjólfsson 73.)
Keflavík (4-4-2): Ómar Jóhannsson - Guðjón Antoníusson, Guðmundur Mete, Baldur Sigurðsson, Issa Abdulkadir - Hólmar Örn Rúnarsson, Jónas Guðni Sævarsson, Kenneth Gustavsson, Branko Milicevic (Símun Samuelsen 45.) - Hörður Sveinsson (Stefán Örn Arnarsson 77.), Guðmundur Steinarsson
Varamenn: Magnús Þormar, Michael Johansson, Gestur Gylfason
Gul spjöld: Jónas Guðni Sævarsson (35.), Issa Abdulkadir (85.), Stefán Örn Arnarsson (86.)
Dómari: Kristinn Jakobsson
Aðstoðardómarar: Eyjólfur Ágúst Finnsson og Ólafur Ingvar Guðfinnsson
Eftirlitsdómari: Gunnar Randver Ingvarsson
Áhorfendur: 782
Branko og Herði varð lítið ágengt í gærkvöldi frekar en félögum þeirra.
(Mynd. Jón Örvar Arason)
