Fram - Keflavík á miðvikudag kl. 20:00

Mðvikudaginn 27. júní leika Fram og Keflavík í 1. deild kvenna og fer leikurinn fram á Framvellinum í Úlfarsdal.  Okkar lið er með átta stig eftir fimm leiki í deildinni en Fram hefur unnið alla sína leiki og er efst í riðlinum með 18 stig.  Dómari leiksins verður Arnar Þór Stefánsson og aðstoðardómarar þeir Samir Mesetovic og Ásgrímur Harðarson.

Okkar stelpur töpuðu fyrsta leik sínum í sumar þegar þær heimsóttu lið BÍ/Bolungarvíkur um síðustu helgi.  Lokatölur urðu 3-1 þar sem Dagmar Þráinsdóttir náði forystunni fyrir Keflavík en Talita B. Pereira gerði þrennu fyrir Vestanstúlkur og tryggði þeim öll stigin.

• Þetta var fyrsti deildarleikur Keflavíkur og BÍ/Bolungarvíkur.  Keflavík og BÍ léku reyndar saman í B-deildinni árið 1992 og þá vann BÍ sinn heimaleik 4-0 en leiknum í Keflavík lauk með 1-1 jafntefli.
           
• Dagmar Þráinsdóttir skoraði annað deildarmark sitt í sumar og fimmta markið fyrir Keflavík í 17 leikjum.  Dagmar hefur einnig skorað eitt mark í bikarnum í sumar.
    
• Keflavík hafði ekki fengið á sig mark í fyrstu fjórum leikjum sínum í deildinni í ár og jafnaði þar með besta árangur liðsins en árið 2004 fékk liðið ekki á sig mark í fyrstu fjórum deildarleikjunum.  Þá vann liðið reyndar fyrstu 10 leikina og vann síðan deildina.
   
• Fyrirliðinn Karitas Ingimarsdóttir lék sinn 50. deildarleik en sá fyrsti var gegn Þór/KA í A-deildinni í september 2008.  Karitas hefur leikið 19 leiki í efstu deild fyrir Keflavík en 31 í B-deildinni og þar hefur hún einnig skorað sjö mörk.  Þess má geta að Karitas gekk einmitt til liðs við Keflavík frá BÍ/Bolungarvík þegar liðið hætti að leika í Íslandsmótinu en það mætir aftur til leiks í sumar eftir fjögurra ára hlé.