Fullstórt tap í ágætum leik
Keflavík tapaði fyrir Íslandsmeisturum FH í fyrsta leik sínum í Landsbankadeildinni á þessu sumri. Lokatölur urðu 0-3 sem var fullstórt tap miðað við gang leiksins. Jafnræði var lengst af með liðunum en FH-ingar voru marki yfir í hálfleik. Tryggvi Guðmundsson skoraði á 27. mínútu eftir að hafa fengið langa sendingu fram kantinn. Hann náði að leika á Guðjón og skora með góðu skoti í fjærhornið, óverjandi fyrir Ómar. Í seinni hálfleik var svipað upp á teningnum, okkar menn sóttu nokkuð en náðu ekki að skapa sér veruleg færi. Þeir urðu að gera sér að góðu langskot sem Daði Lárusson, markvörður gestanna, átti ekki í teljandi vandræðum með. Í uppbótartíma bættu FH-ingar síðan tveimur mörkum við. Það fyrra var sjálfsmark hjá Brian O´Callaghan þegar hann reyndir að komast inn í fyrirgjöf sem stefndi á Allan Borgvardt. Rétt á eftir skoruðu FH-ingar aftur; há sending kom inn í teiginn og stefndi beint á Ómar en Ármann Smári Björnsson náði að stökkva upp og skalla boltann yfir Ómar og í opið markið.
Keflavíkurliðið lék í raun ágætlega í leiknum og hafði lengstum í fullu tré við Íslandsmeistarana. Þó vantaði meira bit í sóknina og við náðum aldrei að komast í dauðafæri. Nokkur ágæt langskot sáu dagsins ljós, það besta var aukaspyrna frá Guðmundi sem Daði varði vel í horn. Einir fimm leikmenn léku sinn fyrsta leik með Keflavík í efstu deild. Brian O´Callaghan, Michael Johansson og Baldur Sigurðsson byrjuðu allir inn á og þeir Bjarni Sæmundsson og Gunnar Hilmar Kristinsson komu inn á sem varamenn.
Brian O´Callaghan stóð sig vel í sínum fyrsta leik.
(Mynd: Hilmar Bragi / Víkurfréttir)
Keflavíkurvöllur, 16. maí 2005
Keflavík 0
FH 3 (Tryggvi Guðmundsson 27., sjálfsmark 90., Ármann Smári Björnsson 90.)
Keflavík (4-5-1): Ómar Jóhannsson - Guðjón Antoníusson, Brian O´Callaghan, Michael Johansson, Gestur Gylfason - Jónas Guðni Sævarsson, Hólmar Örn Rúnarsson, Baldur Sigurðsson, Ingvi Rafn Guðmundsson (Gunnar Hilmar Kristinsson 90.), Hörður Sveinsson - Guðmundur Steinarsson (Bjarni Sæmundsson 65.)
Varamenn: Magnús Þormar, Ásgrímur Albertsson, Atli Rúnar Hólmbergsson
Gult spjald: Gestur Gylfason (74.)
Dómari: Ólafur Ragnarsson
Aðstoðardómarar: Einar K. Guðmundsson og Gunnar Sverrir Gunnarsson
Varadómari: Egill Már Markússon
Eftirlitsdómari: Ingi Jónsson
Áhorfendur: 2.357
