Fyrsta tapið í Faxanum

Stelpurnar í 3. flokki tóku á móti Breiðablik í Faxaflóamótinu í gær, spilað var í Reykjaneshöllinni.  Leikur okkar bar þess merki að viss virðing var borin fyrir þessu Breiðabliksliði sem var algjör óþarfi þegar horft er á leikinn eftir á.  Ekki var liðin nema mínuta af leiknum þegar gestirnir komust yfir 0-1.  Markvörður þeirra átti langt útspark og létum við boltann skoppa í völlinn og yfir okkur þar sem að Bliki stakk sér í gegn, lék á markvörðinn og renndi boltanum í netið.  Á 5. mínutu náðum við að jafna leikinn eftir hornspyrnu sem Eva tók og Helena Rós skallaði knöttinn í netið.  Mínutu seinna fá gestirnir hornspyrnu, markvörðurinn náði ekki að halda knettinum sem barst út í markteig þar stóðum við og horfðum á gestina setja á okkur annað markið.  Þarna vantaði alla grimmd og ákveðni að hreinsa í burtu.  Ekki liðu nema sex mínutur eða á þeirri tólftu að við jöfnum leikinn á ný.  Helena Rós tók á rás með boltann upp vinstri kantinn (eins og hún gerir best) upp að endamörkum og gaf boltann fyrir þar sem Karen stökk hæst upp og skallaði í markið, glæsilegt mark.  Sannarlega fjörugar 12 mínutur.  Eftir þessa fjörugu byrjun róaðist leikurinn nokkuð og bæði lið sóttu á víxl en samt var þetta mest miðjuhnoð þar sem Blikarnir voru sterkastar.  Staðan í hálfleik 2-2.

Seinni hálfleikur spilaðist þannig að gestirnir voru að reyna stungur á sína fljótu framherja og við í sama miðjuhnoðinu.  Í þau fáu skipti sem við sóttum upp kantana skapaðist hætta upp við mark Blika og hefðum við alveg getað sett inn eitt með smá heppni.  Þegar 6 mínutur lifðu leiks gerðist umdeilt atvik; varnarmaður hugðist senda boltann til baka á markmann en ekki vildi betur til en að Bliki komst inn á milli, náði boltanum, plataði markmanninn og átti ekkert annað eftir en að renna boltanum í netið.  Hún þrumaði í stöngina og hrökk boltinn í andlit varnarmanns svo úr munni blæddi og í horn.  Aðstoðardómari veifaði og héldu allir að hann væri að dæma horn en aldeilis ekki, hann kallar á dómara leiksins og eftir smá fund dæmir dómarinn vítaspyrnu, furðulegt nokk.  Ekki einu sinni leikmenn Breiðabliks né þjálfari, hvað þá foreldrar, heimtuðu víti en brostu gleitt er dómarinn benti á vítapunktinn.  Úr spyrnuni var skorað og þar með leikurinn einnig.  Stelpurnar geta gert miklu betur og þurfa ekki að óttast nein lið hvað svo sem þau heita, heldur einfaldlega að taka fastar á þeim og spila sinn bolta.

3. flokkur kvenna:
Keflavík - Breiðablik: 2-3 (Helena Rós Þórólfsdóttir, Karen Sævarsdóttir)

Byrjunarlið: Anna Rún Jóhannsdóttir, Justyna Wróblewska, Rebekka Gísladóttir, Helga M. Hauksdóttir,  Ingibjörg S. Björnsdóttir, Birna M. Aðalsteinsdóttir, Eva Kristinsdóttir (fyrirliði), Katrín Steinþórsdóttir, Helena Rós Þórólfsdóttir, Andrea Frímannsdóttir, Karen Sævarsdóttir.
Varamenn: Guðmunda Gunnarsdóttir, Sonja Ósk Sverrisdóttir, Guðbjörg Guðjónsdóttir, Birna Ásgeirsdóttir, Hildur Haraldsdóttir, Bergþóra Sif Vigfúsdóttir, Heiða Guðnadóttir, Sigrún Guðmundsdóttir.

Elís Kristjánsson, þjálfari