Knattspyrna | 5. maí 2014

Góð byrjun

Keflavík vann öruggan sigur á Þór þegar liðin mættust í 1. umferð Pepsi-deildarinnar en lokatölur urðu 3-1. Leikurinn fór fram í blíðskaparveðri enda létu áhorfendur sig ekki vanta og stemmningin var góð hjá stuðningsmönnum beggja liða. Það var Jóhann Birnir Guðmundsson sem gerði fyrsta mark leiksins á 25. mínútu og það var jafnframt fyrsta mark Íslandsmótsins í ár. Hörður Sveinsson bætti við öðru marki á 33. mínútu eftir góða fyrirgjöf frá Brenne og staðan í hálfleik 2-0. Undir lok leiksins var brotið á Einari Orra innan teigs og Hörður skoraði úr vítaspyrnunni. Skömmu síðar minnkuðu gestirnir muninn þegar Ármann Pétur Ævarsson skoraði af stuttu færi.

Næsti leikur er útileikur gegn Val á Vodafone-vellinum á Hlíðarenda fimmtudaginn 8. maí kl. 19:15.

Leikskýrsla á KSÍ.is

Myndir frá leiknum

Þetta var 27. leikur Keflavíkur og Þors í efstu deild. Keflavík hefur nú unnið 10 leiki en Þór sjö, tíu sinnum hefur orðið jafntefli. Markatalan er 49-42 fyrir Keflavík.
Jóhann Birnir Guðmundsson gerði 39. mark sitt fyrir Keflavík í efstu deild en þau hafa komið í 147 leikjum. Hörður Sveinsson er kominn með 44 mörk í efstu deild í 130 leikjum. Hörður er sjötti markahæsti leikmaður Keflavíkur í efstu deild frá upphafi og Jóhann er sjöundi. Þar fyrir ofan eru Þórarinn Kristjánsson með 48 mörk og Jón Ólafur Jónsson með 49.
Jóhann Birnir skoraði þriðja mark sitt gegn Þór í efstu deild og Hörður er einnig kominn með þrjú mörk gegn Þór.
Hörður skoraði í annað sinn úr vítaspyrnu fyrir Keflavík í efstu deild. Fyrra vítaspyrnumark hans kom á heimavelli gegn ÍBV í júlí árið 2005, í 1. umferð deildarinnar.
Jonas Sandqvist og Sindri Snær Magnússon léku báðir sinn fyrsta leik fyrir Keflavík í efstu deild. Paul McShane var í leikmannahópnum en kom ekki inn á en hann lék síðast með Keflavík í efstu deild árið 2010. Þá var Árni Freyr Ásgeirsson í fyrsta sinn í leikmannhópi í efstu deild síðan áríð 2012 en hann missti af síðasta tímabili vegna meiðsla.
Daníel Gylfason og Einar Orri Einarsson fengu gult spjald í leiknum. Daníel fékk sitt annað spjald í efstu deild en Einar Orri er kominn með 28 gul spjöld í 96 leikjum.
Keflavík vann fyrsta leik sinn í deildinni í fyrsta sinn í þrjú ár en liðið byrjaði síðasta sumar með tapi gegn FH og þar áður með jafntefli gegn Fylki. Áður hafði liðið unnið fyrsta leikinn í deildinni árin 2007-2011.
Keflavík er nú að hefja sitt 50. timabil í efstu deild en liðið hefur unnið 24 sigra í opnunarleikjum sínum, gert 13 jafntefli en tapað 13 leikjum. Stærsti sigurinn í fyrstu umferðinni var 6-1 sigur gegn FH árið 1976 en stærsta tapið var í fyrsta leik félagsins í efstu deild, 1-5 gegn ÍA árið 1958. Steinar Jóhannsson hefur gert flest mörk fyrir Keflavík í fyrstu umferð í efstu deild eða sjö og næstur kemur sonur hans, Guðmundur Steinarsson, með sex mörk. Keflavík hefur tvisvar unnið fyrsta leik sinn fimm ár í röð, fyrst árin 1970-1974 og aftur árin 2007-2011. Á árunum 1969 til 1980 tapaði Keflavík ekki í fyrsta leik sínum í efstu deild eða 12 ár í röð.
Keflavík vígði nýja búninga í leiknum en liðið leikur nú í búningum frá Nike. Í sumar leikur liðið í svörtum peysum og hvítum buxum en þannig var Keflavíkurbúningurinn þegar liðið hóf að leika á Íslandsmóti árið 1956. Með þessu eru fyrstu Íslandsmeistarar Keflavíkur heiðraðir en í ár eru 50 ár síðan Keflavík varð fyrst Íslandsmeistari.