Góður sigur á Stjörnunni
Keflavík og Stjarnan áttust við í 11. umferð Landsbankadeildar kvenna í gærkveldi. Leiknum lauk með 4-1 sigri Keflavíkur í skemmtilegum leik þar sem bæði lið lögðu mikið upp úr sóknarleik. Staðan í hálfleik var 1-0.
Fyrri hálfleikur hófst með pressu frá Stjörnunni og strax á 3. mínútu bjargaði Þóra Reyn Rögnvaldsdóttir mjög vel eftir að hafa kýlt frá fyrirgjöf inn í teig og varið svo skot frá Stjörnuleikmanni út við stöng í beinu framhaldi. Vel gert hjá Þóru sem átti mjög góðan leik og var hún mjög örugg í öllum sínum aðgerðum. Fyrsta mark leiksins skoraði Nína Ósk Kristinsdóttir á 14. mínútu eftir góða stungusendingu frá Donnu Cheyne, 1-0. Keflavíkurliðið vann sig betur inn í leikinn eftir því sem á leið. Eftir nokkrar vel útfærðar sóknir beggja liða þar sem Stjarnan átti skot í stangir Keflavíkurliðsins og Stjarnan bjargaði á marklínu góðu skoti Guðnýjar Þórðardóttur skoraði Nína Ósk sitt annað mark á 50. mínútu af stuttu færi, 2-0. Þetta var 20. mark Nínu í sumar í Landsbankadeildinni og er hún næst markahæst. Keflavíkurliðið var komið með ágætis tök á leiknum og gekk boltinn vel á milli manna og sköpuðu þær sér nokkur góð marktækifæri sem ekki nýttust. Á 69. mínútu var skipting hjá Keflavík og inn á kom Karen Sævarsdóttir, efnileg stelpa úr 2. flokki. Hún var aðeins búin að vera inn á í 10 sekúndur þegar hún skoraði glæsilegt mark með skalla eftir hornspyrnu, 3-0. Vel gert hjá Karen, hennar fyrsta mark í efstu deild og það ekki af verri endanum. Ekki voru Keflavíkurstúlkur hættar og á 76. mínútu kom Linda O'Donnell Keflavík í 4-0 með góðu skoti efst í markhornið. Öruggur sigur Keflavíkur staðreynd. Stjörnustúlkur settu sitt mark á 94. mínútu þegar Björg Gunnarsdóttir skoraði. Og þar við sat.
Þessi lið eru að kljást um fjórða sætið og var sigurinn því kærkominn fyrir Keflavík sem var 6 stigum á eftir Stjörnunni fyrir þennan leik. Góður leikur og öruggur sigur Keflavíkurliðsins.
Næsti leikur er gegn FH á Kaplakrikavelli í Hafnarfirði 11. ágúst kl.19:15.
Keflavík: Þóra Reyn, Inga Lára, Linda (Eva 77.), Elísabet Ester, Guðný Petrína, Lilja Íris, Karen Penglase (Karen Sævars 69.), Danka, Donna, Vesna, Nína
Varamenn: Anna Rún, Guðbjörg, Birna Marin, Thelma
ÞÞ
Myndir: Jón Örvar Arason
Nína Ósk kemur Keflavík yfir.
Marki Nínu fagnað.
Linda O'Donnell umkringd Stjörnustúlkum.
Hætta við mark Stjörnunnar.
Nína Ósk skorar sitt annað mark og kemur Keflavík í 2-0.
...og seinna marki Nínu fagnað.
Karen Sævars kemur Keflavík í 3-0...
og var aðeins búin að vera inn á í 10 sekúndur!
Linda O'Donnell skorar fjórða mark Keflvíkur, 4-0.
Guðný Þórðar, besti maður vallarins (að mati ljósmyndara).
Hætta við mark Keflavíkur en Þóra Reyn ver mjög vel.
