Góður sigur gegn Fram
Keflavík vann Fram 3-2 þegar liðin mættust í Lengjubikarnum en leikið var í Egilshöll. Framarar náðu forystunni í fyrri hálfleik þegar Arnþór Ari Atlason skoraði. Snemma í seinni hálfleik jafnaði Jóhann Birnir Guðmundsson metin og skömmu síðar kom Daníel Gylfason okkar liði yfir. Framarar jöfnuðu jafnharðan með marki Einas Más Þórissonar en á 71. mínútu leiksins gerði varamaðurinn Bojan Stefán Ljubicic sigurmark Keflavíkur. Þess má geta að Einar Orri Einarsson var fyrirliði Keflvíkur í leiknum og er það í fyrsta sinn sem hann gegnir þeirri stöðu.
Keflavík er nú í 2. sæti riðilsins með 6 stig eftir tvo leiki. Næsti leikur er gegn ÍA í Akraneshöllinni laugardaginn 8. mars kl. 12:00.
Á myndinni með fréttinni eru markaskorarar Keflavíkur, Jóhann Birnir Guðmundsson, Daníel Gylfason og Bojan Stefán Ljubicic. Hér að neðan er byrjunarlið Keflavíkur og neðst er fyrirliðinn Einar Orri.
Myndir: Jón Örvar.
