Góður sigur gegn Norðanstúlkum

Keflavík spilaði loks í föstudagskvöld eftir ótrúlega langt stopp eða nærri þrjár vikur.  En loksins var komið að því og stelpurnar tóku á móti Tindastól/Neista á glæsilegum Sparisjóðsvellinum í Keflavík.  Keflavík var sterkara liðið allan tímann en gekk illa að nýta færin.  Þær náðu þó forystunni á 29. mínútu þegar Sigurrós Eir skoraði og eftir nokkur góð færi náði Nína Ósk að bæta við öðru marki á 43. mínútu.  Staðan í hálfleik 2-0.

Síðari hálfleikur bauð upp á það sama.  Keflavíkurstúlkur sóttu en náðu ekki að nýta færin og hélt besti leikmaður gestanna, markvörðurinn Sigurbjörg Þ. Marteinsdóttir, sínu liði inn í leiknum með stórgóðum leik.  En það var svo á 84. mínútu að Keflavík gerði út um leikinn með þriðja markinu.  Eftir aukaspyrnu og darraðardans í teignum náði Fanney að skora og tryggja öruggan sigur Keflavíkur, 3-0.

• Jóhanna Kristinsdóttir og Heiðrún Þorsteinsdóttir komu inn undir lok leikins og léku báðar sinn fyrsta leik með meistaraflokki.  Jóhanna er 16 ára en Heiðrún er 15 ára.
   
• Sigurrós Eir Guðmundsdóttir kom Keflavík yfir í leiknum og skoraði þar með sitt fyrsta mark fyrir félagið. Sigurrós verður 17 ára síðar í þessum mánuði en hún hefur þegar leikið 14 deildarleiki fyrir Keflavík og tvo bikarleiki.
    
• Fyrirliðinn Anna Rún Jóhannsdóttir lék sinn 50. deildarleik fyrir Keflavík.  Þar af eru 42 í efstu deild en 8 í þeirri næstefstu.  Hún hefur einnig leikið sjö bikarleiki.  Anna Rún hóf feril sinn með meistaraflokki sem markvörður en leikur nú í vörninni.

Heiðrún Sjöfn Þorsteinsdóttir kemur inn á í sínum fyrsta meistaraflokksleik.

Fanney skorar 3ja markið.