Góður sigur suður á Spáni

Keflavík vann í dag góðan 2-1 sigur á spænska liðinu Recreativo Huelva en leikið var á Spáni.  Það voru þeir Símun Samuelsen og Danny Severino sem skoruðu mörkin.  Leikurinn var virkilega góður hjá okkar strákum og uppskeran var góður sigur á sterku spænsku liði.  Það var hart barist í leiknum og Spánverjarnir voru ekki á því að láta einhverja útlendinga vinna sig létt.  Tæklingarnar flugu á báða bóga og gulu spjöldin hrönnuðust upp.  Íslenskt dómaratríó leiksins hafði því í mörg horn að líta og komst vel frá sínu með Erlend Eiríksson dómara á fararbroddi.  Okkar menn töldu sig reyndar hafa skorað þriðja mark sitt í leiknum en dómararnir töldu boltann ekki hafa farið yfir línuna.  Eins og áður sagði var hart tekist á og undir lok fyrri hálfleiks þurftu þeir Guðjón og Branko báðir að yfirgefa völlinn meiddir.  Ekki er ljóst hvort þau meiðsli eru alvarleg.  Í síðari hálfleiknum var öllum varamönnunum skipt inn á; yngri leikmennirnir fengu þá tækifæri og stóðu sig með prýði.  Rétt undir lokin kom fyrirliðinn Guðmundur Steinarsson svo inn á en ekki hafði verið reiknað með að hann gæti tekið þátt í leiknum.  Næsti leikur Keflavíkur í Spánarreisunni er gegn Aymonte á morgun og hefst sá leikur kl. 17:00 að íslenskum tíma.  Á föstudaginn verður svo leikið gegn Breiðablik en Blikar eru í æfingaferð þar suður frá rétt eins og Keflavík.

Færeyska undrabarnið Símun Samuelsen skoraði gegn Recreativo Huelva.