Góður útisigur hjá 3. flokki kvenna

3. flokkur kvenna lék í gær gegn HK í Kópavogi.  Blíðskapaveður var í Fossvogsdalnum er leikurinn fór fram, sólin skein skært á leikmenn og gerði þeim í leiðinni erfitt fyrir.  Leikurinn byrjaði á rólegu nótunum og við sköpuðum nokkur færi sem hefðu átt að nýtast betur.  Það var því algjörlega gegn gangi leiksins er HK tók forystu á 15. mínútu þegar fyrirgjöf frá hægri barst á fjærstöng þar sem ein Kópavogsstúlkna stóð óvölduð og átti ekki í vandræðum að skora.  Við þetta mark fóru okkar stelpur að láta meira að sér kveða og sóttu linnulaust næstu mínutur.  Til að mynda björguðu HK-stúlkur á marklínu.  Þessi sóknarþungi bar loks árangur þegar Karen skoraði með langskoti á 30. mínútu.  Enn hélt pressan á mark HK áfram og mínútu fyrir leikhlé náði Helena Rós forystu fyrir okkur eftir að hafa fengið fyrirgjöf út í teig frá Birnu.  Helena gerði sér lítið fyrir, tók boltann á lofti og afgreiddi hann viðstöðulaust í hægra hornið, gjörsamlega óverjandi fyrir markvörð HK.

Í seinni hálfleik vorum við mun meira með boltann og þjörmuðum í leiðinni nokkuð að marki heimastúlkna.  Á 65. mínútu fengum við hornspyrnu og eftir nokkurt klafs í teignum náði Andrea að skora og koma okkur í 3-1.  HK náði síðan að minnka muninn á 73. mínútu eftir að við töpuðum boltanum í einni sóknaraðgerð okkar.  Einföld stungusending kom inn fyrir vörnina og átti sú sem skoraði ekki í vandræðum að setja boltann fram hjá Önnu í markinu sem kom út á móti.  Sjö mínutur eftir af leiknum og HK-stelpur eygðu smá von að jafna leikinn.  En Helena Rós var á annarri skoðun.  Á 75. mínútu átti Sonja glæsilega sendingu á Helenu út á vinstri kantinn.  Hún tók á móti boltanum, lék honum aðeins áfram og lét skotið vaða á markið og boltinn steinlá í netinu.  Staðan orðin 4-2 okkur í vil og það urðu reyndar lokatölur þessa leiks.  Stelpurnar voru á köflum að spila fínan bolta og baráttan var til staðar.  Þegar þetta nær saman er oftast von á góðu.

3. flokkur, HK - Keflavík: 2-4 (Helena Rós 2, Karen S., Andrea)
Keflavík: Anna Rún, Bergþóra, Helga Maren, Rebekka, Ingibjörg, Birna Marín, Eva, Hildur, Helena Rós, Andrea, Karen S., Sonja, Jóna, Ingey, Kristín, Karen H.

Mynd: Helena Rós skoraði tvö glæsileg mörk gegn HK í Kópavoginum.