Heimaleikur gegn FH í bikarnum

Keflavík og FH mætast í 8 liða úrslitum VISA-bikarsins en dregið var í hádeginu í dag.  Leikurinn fer fram á Sparisjóðsvellinum í Keflavík 30. júlí.  Þetta er þriðji heimaleikur okkar í bikarnum í ár og fimmti heimaleikurinn af síðustu sex bikarleikjum Keflavíkur.  Það er ágætis tilbreyting en áður hafði Keflavíkurliðið leikið 17 útileiki í röð í bikarkeppninni.

Keflavík og FH mættust einmitt í 16 liða úrslitum VISA-bikarsins síðasta sumar og þá vann Keflavík 3-1 á Sparisjóðsvellinum.  Guðmundur Steinarsson, Guðjón Árni Antoníusson og Patrik Redo skoruðu fyrir Keflavík í þeim leik en Matthías Vilhjálmsson skoraði mark FH.  Liðin hafa mæst átta sinnum í bikarkeppninni í gegnum árin.  Keflavík hefur unnið fjóra leiki og FH þrjá en einum leik lauk með jafntefli.  Markatalan er 10-6 fyrir Keflavík í bikarleikjum gegn FH.

8 liða úrslit VISA-bikarsins, 30. júlí:
HK - Breiðablik
Valur - KR
Keflavík - FH
Fram - Fylkir