Keflavík - Fylkir á fimmtudag kl. 19:15

Fimmtudaginn 15. maí leika Keflavík og Fylkir í 2. umferð Landsbankadeildarinnar.  Leikurinn fer fram á Sparisjóðsvellinum í Keflavík og hefst kl. 19:15.  Okkar menn eru auðvitað staðráðnir í því að fylgja eftir góðum sigri á Val í 1. umferðinni en Fylkir tapaði þá fyrir Fram og það er ljóst að Árbæingar koma ákveðnir til leiks í Keflavík.  Dómari leiksins verður Garðar Örn Hinriksson, aðstoðardómarar þeir Einar Sigurðsson og Gunnar Sverrir Gunnarsson en eftirlitsmaður KSÍ er Jón Sigurjónsson.

Keflavík og Fylkir hafa leikið 20 leiki í efstu deild, þann fyrsta árið 1989.  Það er nokkuð jafnt á komið með liðunum í innbyrðis leikjum þeirra; Keflavík hefur unnið 7 leikjanna, jafnoft hefur orðið jafntefli en Fylkir hefur unnið 6 leiki.  Markatalan er 25-27 fyrir Fylki.  Stærsti sigur Fylkis er 4-0 árin 2007 og 2000 en Keflavík hefur mest náð að sigra Fylki með 2ja marka mun.  Sex leikmenn sem nú eru í leikmannahópi Keflavíkur hafa skorað gegn Fylkismönnum í efstu deild.  Þórarinn Kristjánsson hefur skorað 4 mörk, Guðmundur Steinarsson 3 og þeir Hörður Sveinsson, Hólmar Örn Rúnarsson, Guðjón Antoníusson og Símun Samuelsen hafa allir gert eitt mark.

Liðin mættust 8 sinnum í næstefstu deild á árunum 1981-1992.  Keflavík vann 6 leiki, einum lauk með jafntefli og Fylkir vann einn leik.  Markatalan í B-deildinni er 15-6 fyrir Keflavík.

Liðin hafa mæst þrisvar sinnum í bikarkeppni KSÍ, árin 1989, 1995 og 2004.  Keflavík hefur unnið alla þrjá leikina og markatalan er 5-1.  Þórarinn Kristjánsson hefur skorað eitt bikarmark gegn Fylki en það var eina markið í 8 liða úrslitum árið 2004 en Keflavík fór síðan alla leið og vann bikarinn.

Liðin mættust að sjálfsögðu tvívegis í Landsbankadeildinni á síðasta sumri.  Keflavík vann fyrri leikinn á Keflavíkurvelli þar sem Símun Samuelsen skoraði eina mark leiksins.  Síðari leikur liðanna fór fram á Fylkisvelli í næstsíðustu umferð deildarinnar.  Þá var heldur farið að halla undan fæti hjá okkar mönnum og Fylkir vann 4-0.  Albert Ingason skoraði þrennu eftir að Peter Gravesen hafði komið heimamönnum yfir.  Sigurbergur Elísson kom inn á sem varamaður hjá Keflavík í leiknum og varð yngsti leikmaðurinn til að leika í efstu deild frá upphafi, 15 ára og 105 daga gamall.

Það er skemmst frá því að segja að Fylkir hefur aldrei náð að sigra í Keflavík í efstu deild.  Liðin hafa nú leikið 10 sinnum í efstu deild á Keflavíkurvelli og hefur Keflavík unnið 6 leikjanna en fjögur jafntefli hafa litið dagsins ljós.

Úrslit í leikjum Keflavíkur og Fylkis í efstu deild í Keflavík hafa orðið þessi: