Keflavík - Fylkir á sunnudag kl. 14:00
Keflavík og Fylkir mætast í 16. umferð Landsbankadeildarinnar sunnudaginn 10. september og hefst leikurinn á Keflavíkurvelli kl. 14:00. Það þarf ekki að fjölyrða um mikilvægi leiksins; Keflavík er í 4. sæti deildarinnar með 22 stig en Fylkir er í því 6. og hefur 19 stig. Liðið í næstefsta sæti er með 24 stig og liðið í næstneðsta sætinu er með 17 stig þannig að hvert stig getur ráðið úrslitum um lokastöðuna í deildinni í ár. Dómari leiksins verður Kristinn Jakobsson, aðstoðardómararar Pjetur Sigurðsson og Gunnar Sverrir Gunnarsson og eftirlitsmaður KSÍ er Þorvarður Björnsson .
Keflavík og Fylkir hafa leikið 17 leiki í efstu deild, þann fyrsta árið 1989. Nokkuð jafnt er komið á með liðunum í innbyrðis leikjum. Keflavík hefur unnið 6 leiki og Fylkir 5 en sex hefur lokið með jafntefli. Markatalan er 21-23 fyrir Fylki. Stærsti sigur Fylkismanna er 4-0 árið 2000 en Keflavík hefur unnið nokkra leiki með tveggja marka mun. Mesti markaleikur milli liðanna kom árið 2004 þegar Keflavík vann 4-2. Þrír leikmenn sem nú leika með Keflavík hafa skorað gegn Fylki í efstu deild; Þórarinn Kristjánsson hefur gert fjögur mörk, Guðmundur Steinarsson þrjú og Stefán Örn Arnarson eitt mark. Það er athyglisvert að Keflavík hefur aldrei tapað heima gegn Fylki í efstu deild. Í leikjunum átta í Keflavík hefur þremur lokið með jafntefli en Keflavík hefur unnið fimm leikjanna.
Liðin hafa þrisvar mæst í bikarkeppninni og hefur Keflavík unnið alla leikina, árin 1989, 1995 og 2004. Markatalan er 5-1 fyrir Keflavík.
Keflavík mætti Fylki 8 sinnum í B-deild á árunum 1981-1992. Þar vann Keflavík sex leikjanna, einum lauk með jafntefli og Fylkir vann einn. Markatalan er 15-5 fyrir Keflavík.
Liðin mættust í 7. umferð Landsbankadeildarinnar fyrr í sumar. Fylkismenn unnu þá 2-1 á heimavelli sínum; Sævar Þór Gíslason skoraði bæði mörk Fylkis en Guðmundur Steinarsson skoraði fyrir Keflavík.
Ekki hefur verið mikill samgangur milli Keflavíkur og Fylkis í gegnum árin. Keflvíkingurinn Haukur Ingi Guðnason er nú í herbúðum Fylkis og þá hefur Þórir Sigfússon starfað sem þjálfari hjá báðum félögum.
Úrslit í leikjum Keflavíkur og Fylkis í Keflavík hafa orðið þessi í efstu deild:
| 2005 |
Keflavík - Fylkir |
2-2 | Sjálfsmark Stefán Örn Arnarson | ||
| 2004 |
Keflavík - Fylkir |
4-2 | Þórarinn Kristjánsson 2 Haraldur Freyr Guðmundsson Hörður Sveinsson | ||
| 2002 |
Keflavík - Fylkir |
3-1 | Jóhann Benediktsson Guðmundur Steinarsson Þórarinn Kristjánsson | ||
| 2001 |
Keflavík - Fylkir |
2-1 | Haukur Ingi Guðnason Guðmundur Steinarsson | ||
| 2000 |
Keflavík - Fylkir |
1-1 | Hjálmar Jónsson | ||
| 1996 |
Keflavík - Fylkir |
0-0 | |||
| 1993 |
Keflavík - Fylkir |
2-1 | Róbert Sigurðsson Óli Þór Magnússon | ||
| 1989 |
Keflavík - Fylkir |
2-1 | Jóhann B. Magnússon |
