Keflavík - Fylkir í dag kl. 18:00
Í dag leika Keflavík og Fylkir á Keflavíkurvelli og við vekjum athygli á því að leikurinn hefst kl. 18:00. Liðin er geysimikilvægur fyrir bæði lið; Fylkir er nú í 3. sæti deildarinnar með 20 stig og þarf á stigum að halda til að halda í við FH og ÍBV í toppbaráttunni. Keflavík er í 6. sæti með 15 stig og þarf sömuleiðis stigin til að halda í við liðin í efri hlutanum.
Það er athyglisvert að í 11 heimsóknum til Keflavíkur hefur Fylkismönnum aðeins tekist að sigra einu sinni í deild og bikar; það var leikur í B-deild árið 1990. Liðin hafa leikið sex sinnum í efstu deild á Keflavíkurvelli og hafa gestirnir aldrei farið með öll stigin heim.
Keflavík og Fylkir hafa mæst 13 sinnum í efstu deild; bæði liðin hafa unnið fjóra leiki en fimm leikjum hefur lokið með jafntefli. Markatalan er 15-19, Fylki í vil. Þegar liðin léku fyrr í sumar vann Fylkir 2-0 í Árbænum.
Frá bikarleiknum í vikunni.
(Mynd: Þorgils Jónsson / Víkurfréttir)
Liðin hafa einnig leikið 8 leiki í B-deild, fyrst 1981 en síðast 1992. Þar hefur Keflavík sex sinnum farið með sigur af hólmi, Fylkismenn aðeins einu sinni en einum leik lauk með jafntefli. Markatalan er 15-5, okkur í hag.
Keflavík hefur þrisvar mætt Fylki í bikarkeppninni og unnið alla leikina og markatalan er 5-1. Þau mættust einmitt á dögunum í 8 liða úrslitum bikarkeppninnar og þá unnum við 1-0.
Tveir leikmenn sem nú leika með Keflavík hafa skorað gegn Fylki í deildarleik. Guðmundur Steinarsson og Þórarinn Kristjánsson hafa báðir skorað tvívegis gegn Fylkismönnum í efstu deild. Þórarinn hefur einnig skorað eitt bikarmark gegn Fylki eins og fólki ætti að vera í fersku minni. Þess má geta að Haukur Ingi Guðnason hefur einnig skorað tvívegis gegn Fylki fyrir Keflavík en hann er nú í röðum Fylkismanna þó Haukur sé nú úr leik vegna meiðsla.
Leikir liðanna í Keflavík í efstu deild:
| 2002 |
Keflavík - Fylkir |
3-1 | Jóhann Benediktsson, Guðmundur Steinarsson, Þórarinn Kristjánsson | ||
| 2001 |
Keflavík - Fylkir |
2-1 | Haukur Ingi Guðnason, Guðmundur Steinarsson | ||
| 2000 |
Keflavík - Fylkir |
1-1 | Hjálmar Jónsson | ||
| 1996 |
Keflavík - Fylkir |
0-0 | |||
| 1993 |
Keflavík - Fylkir |
2-1 | Róbert Sigurðsson, Óli Þór Magnússon | ||
| 1989 |
Keflavík - Fylkir |
1-0 | Jóhann B. Magnússon |
(Heimild: Íslensk knattspyrna / Víðir Sigurðsson)
Sjá upplýsingapakka um leikinn á heimasíðu KSÍ (pdf.-skjal).
