Keflavík - ÍA á sunnudag kl. 19:15

Keflavík og ÍA mætast í 4. og umferð Landsbankadeildarinnar á sunnudag.  Leikurinn hefst kl. 19:15 á Sparisjóðsvellinum í Keflavík.  Eins og flestir ættu að vita eru okkar menn nú á toppi deildarinnar ásamt Fjölni með fullt hús stiga.  Skagamenn eru um miðja deild og hafa unnið einn leik, gert eitt jafntefli og tapað einum leik.  Það er alltaf hart tekist á þegar þessi lið mætast og nokkuð víst að svo verður einnig í þetta sinn.  Dómari leiksins verður Ólafur Ragnarsson, aðstoðardómarar hans verða Einar Sigurðsson og Jóhann Gunnar Guðmundsson og Ingi Jónsson er eftirlitsmaður KSÍ.

Keflavík og ÍA hafa mæst 83 sinni í efstu deild og hafa Skagamenn talsverða yfirburði í viðureignum liðanna.  Liðin mættust fyrst árið 1958 þegar við lékum fyrst í efstu deild.  Akranes vann þann leik 5-1 en Högni Gunnlaugsson skoraði mark Keflavíkur.  Alls hefur ÍA sigrað í 46 leikjum, 12 sinnum hefur orðið jafntefli en Keflavík hefur unnið 25 leiki.  Markatalan er 97-174, Skagamönnum í vil.  Stærsti sigur Keflavíkur í leikjum liðanna er 4-1 sigur árið 1973 en stærsta tapið var 0-9 tap árið 1959 en það er stærsta tap Keflavíkur í efstu deild.  Fimm leikmenn í leikmannahópi Keflavíkur hafa skorað gegn ÍA í efstu deild; Þórarinn Kristjánsson hefur skorað fjögur mörk, Hallgrímur Jónasson þrjú, Guðmundur Steinarsson og Guðjón Antoníusson hafa skorað tvö mörk og Magnús Þorsteinsson og Hörður Sveinsson eitt mark hvor.

Liðin mættust tvisvar í næstefstu deild en það var árið 1991.  Skagamenn unnu báða leikina og markatalan var 1-6.

Keflavík og ÍA hafa leikið 13 leiki í bikarkeppninni, fyrst árið 1960 og síðast í fyrra.  Keflavík hefur unnið 5 leikjanna en ÍA 7 en einum lauk með jafntefli.  Markatalan er 16-19 fyrir ÍA.  Þrír leikmenn Keflavíkur hafa skorað bikarmark gegn ÍA; Guðmundur Steinarsson hefur skorað tvö og Þórarinn Kristjánsson og Símun Samuelsen eitt hvor en þessi mörk komu öll í mögnuðum bikarleik liðanna árið 2006.

Báðir leikirnir liðanna í Landsbankadeildinni í fyrra voru hinir fjörugustu.  Skagamenn sigruðu 2-1 á Akranesi með tveimur mörkum frá Bjarna Guðjónssyni en Hallgrímur Jónasson skoraði fyrir Keflavík.  Seinni leiknum lauk með 3-3 jafntefli þar sem Hallgrímur skoraði tvö mörk og Guðjón Antoníusson eitt en Vjekoslav Svadumovic, Bjarni Guðjónsson og Jón Vilhelm Ákason skoruðu fyrir ÍA.

Í gegnum árin hafa nokkir leikmenn leikið með báðum þessum liðum og má þar nefna Bjarna Sigurðsson, Kristján Jóhannsson og Bjarka Freyr Guðmundsson.

Úrslit í leikjum Keflavíkur og ÍA í Keflavík hafa orðið þessi í efstu deild undanfarin ár: