Keflavík í úrslitaleik VISA-bikars kvenna

Keflavík sigraði Fjölni í kvöld í undanúrslitum VISA-bikars kvenna á Keflavíkurvelli með þremur mörkum gegn einu.  Keflavík komst í 3-0 með mörkum frá Vesnu Smiljokovic á 8. mínútu og Dönku Podovac á 38. og 50. mínútu.  Mark Fjölnis gerði Rúna Sif Stefánsdóttir á 51. mínútu.  Fyrra mark Dönku var stórglæsilegt, líklega eitt af flottari mörkum sumarsins í kvennaboltanum.

Úrslitaleikurinn verður á Laugardagsvelli 22. september n.k. og verða KR andstæðingar Keflavíkur, en þær sigruðu Breiðablik 7-3 í Kópavogi í kvöld.

ÞÞ

Keflavíkurstúlkur bregða á leik eftir sigur á Fjölni í kvöld.
(Mynd: Víkurfréttavefur vf.is)