Keflavík-ÍA á fimmtudag kl 19:15
Keflavík mætir stigalausum ÍA-mönnum fimmtudaginn 8.júní kl 19:15 á Keflavíkurvelli. ÍA hefur byrjað mótið skelfilega og tapað öllum fimm leikjum sínum og sitja einir í neðsta sætinu. Keflavík er í 6. sætinu með sjö stig eftir fimm leiki.
Ef við lítum á tölfræðina þá eru 75% líkur á sigri Skagamanna. Í síðustu 12 leikjum þessara liða í Keflavík þá hafa Skagamenn unnið níu leiki, Keflavík tvo og eitt jafntefli. Ekki gott það. Eitt er víst að það verða skoruð mörk í þessum leik því í síðustu 24 leikjum liðanna hefur engin 0-0 leikur litið dagsins ljós.
Skagamenn koma dýrvitlausir í þennan leik og ætla sér að innbyrða fyrstu stigin sín hér. En strákarnir í Keflavíkurliðinu koma líka mjög vel stemmdir í þennan leik og leikir liðsins að undanförnu sýna að þarna er eitt besta lið deildarinnar á ferðinni. Þrátt fyrir mjög svo ósanngjarnt tap gegn FH í síðasta leik þá sýndu strákarnir oft á tíðum flottan fótbolta. Það dettur engum manni það í hug að vanmeta Skagamenn.
Dómari í leiknum verður Erlendur Eiríksson og aðstoðardómarar verða þeir Gunnar Gylfason og Oddbergur Eiríksson. Eftirlitsmaður KSÍ verður Gísli Björgvinsson.
Hvet alla að mæta á völlinn og styðja strákana til sigurs í þessum leik. Þetta verður hörkuleikur sem engin má missa af. ALLIR Á VÖLLINN.
ÁFRAM KEFLAVÍK
Frá leiknum í fyrra.
