Keflavík-ÍA í kvöld!!

Í kvöld leika Keflavík og ÍA í 7. umferð Landsbankadeildarinnar og hefst leikurinn kl. 19:15.  Eins og flestir vita er Keflavíkurliðið nú í 3. sæti deildarinnar með 10 stig en gestirnir eru í 4.-6. sæti með 9 stig.  Það má því búast við spennandi leik á Keflavíkurvelli í kvöld.

ÍA er það lið sem Keflavík hefur leikið oftast gegn í efstu deild eða 77 leiki, þann fyrsta árið 1958.  Skagamenn hafa haft mun betur í viðureignum liðanna gegnum árin, þeir hafa unnið 48 leiki, Keflavík hefur unnið 18 en jafntefli hefur 11 sinnum verið niðurstaðan.  Markatalan er 86-169, ÍA í vil. 

Liðin hafa einnig leikið 12 bikarleiki.  ÍA hefur unnið 7 þeirra en Keflavík 4 og einum leik lauk með jafntefli.  Þar er markatalan 13-17 fyrir ÍA.  Liðin léku einmitt í 16 liða úrslitum VISA-bikarsins í fyrra og þá vann ÍA 1-0 á heimavelli sínum.  Liðin hafa þrisvar sinnum leikið til úrslita í bikarkeppninni, árin 1982 og 1993 vann ÍA 2-1 en árið 1975 vann Keflavík 1-0 og varð bikarmeistari í fyrsta sinn. 

Af þeim leikmönnum sem nú eru í leikmannahópi Keflavíkur hefur Þórarinn Kristjánsson skorað þrjú deildarmörk gegn Skagamönnum og þeir Guðmundur Steinarsson, Hörður Sveinsson og Magnús Þorsteinsson eitt hver.