Lengjubikarinn aftur af stað

Eftir vel heppnaðar æfingaferðir til Spánar eru liðin okkar að fara aftur af stað í Lengjubikarnum hér heima.

Á föstudag leikur kvennaliðið við Hauka í B-deild keppninnar.  Liðin leika á Ásvöllum í Hafnarfirði og hefja leik kl. 18:00.  Okkar lið vann ÍR örugglega í síðasta leik en hafði áður tapað tveimur fyrstu leikjum sínum.  Hauka-stúlkur eru með einn sigur og eitt tap í riðlinum.  Það er Guðrún Fema Ólafsdóttir sem dæmir leikinn en aðstoðardómarar eru Atli Már Sigmarsson og Jovana Cosic.

Karlaliðið leikur á laugardaginn þegar lið ÍBV kemur í heimsókn en liðin leika í Reykjaneshöllinni kl. 14:00.  Eyjamenn eru með 10 stig í riðlinum en okkar menn eru með 15 stig og hafa þegar tryggt sér sæti í 8 liða úrslitum keppninnar.  Dómari leiksins verður Þorvaldur Árnason, aðstoðardómarar Ólafur Ingvar Guðfinnsson og Gunnar Sverrir Gunnarsson en eftirlitsmaður er Ragnar Örn Pétursson.

Við hvetjum stuðningsmenn til að mæta á leikina og styðja okkar fólk.