LOKAÚTKALL - Allir á völlinn!

Á dögunum birtum við útkall til stuðningsmanna Keflavíkur fyrir leikinn gegn FH í Kaplakrika.  Eins og við mátti búast brást okkar fólk vel við, fjölmennti í Fjörðinn og stóð þétt við bakið á strákunum okkar.  Við þökkum frábæran stuðning þó úrslitin hafi ekki verið eins og við vonuðumst eftir.  Nú er komið að lokaútkalli sumarsins því nú er aðeins einn leikur eftir á tímabilinu og hann hefur ALLT að segja.  Á laugardaginn kl. 16:00 leikum við gegn Fram á heimavelli okkar í Keflavík.  Við þurfum sigur í leiknum og þá er Íslandsmeistaratitillinn okkar.

Nú skorum við aftur á Keflvíkinga að mæta á völlinn.  Stuðningurinn í sumar hefur skipt liðið miklu máli og átt stóran þátt í velgengni þess.  Nú þurfa strákarnir hvatningu og stuðning frá fyrstu mínútu og þar til yfir lýkur á laugardaginn.  Nú mætum við öll og tökum vini og vandamenn með okkur, pabba og mömmu, afa og ömmu, frænkur og frændur...  Það væri líka til að auka stemmninguna ef allir væru bláklæddir á pöllunum og sýndu þannig samstöðu og stuðning við Keflavík.

Við bendum á að það má búast við metfjölda á völlinn á laugardaginn.  Það er því betra að mæta tímanlega til að missa ekki af neinu og þá er líka hægt að byggja upp stemmningu fyrir leikinn.  Miðar verða seldir í forsölu á skrifstofu Knattspyrnudeildar við Sunnubraut kl. 14:00-18:00 á föstudag.  Miðaverð í forsölu er 1.200 kr. en á leikdegi kostar miðinn 1.500 kr.  Við hvetjum fólk til að tryggja sér miða í tíma og á góðu verði og losna um leið við biðraðir á leiknum.

Að lokum: njótum dagsins og styðjum okkar lið.  ÁFRAM KEFLAVÍK!!!