Óstöðvandi Íslandsmeistarar!
Það fær ekkert stöðvað körfuboltalið Keflavíkur þessa dagana. Eftir sex sigra í röð í úrslitakeppninni bætti liðið þeim sjöunda við með sigri á fóboltaliðinu í hinu árlega einvígi liðanna í gær. Fyrir leikinn færðu forsvarsmenn knattspyrnunnar félögum sínum í körfunni blóm og hamingjuóskir með Íslandsmeistaratitilinn sem vannst á dögunum.
Svo virtist sem fótboltaliðið hefði engar áhyggjur af leiknum því að þegar körfuliðið mætti til leiks voru fótboltastrákarnir að þreyta þolpróf! Það átti eftir að koma þeim í koll í leiknum og sást það strax í upphafi þegar karfan smellti einni 3ja stiga í grillið á fótboltanum án þess að þeir fengju rönd við reist. Það tók fótboltann smátíma að finna taktinn og þegar um 15 mínútur voru til loka fyrri hálfleiks þá voru þeir komnir í gang og röðuðu inn mörkum. Liðið minnkaði muninn í 8 mörk en karfan fékk 15 mörk í forskot og þar við sat í leikhléi. Seinni hálfleikur byrjaði ágætlega, karfan varðist fimlega og beitti eitruðum skyndisóknum með Sigga Ingimundar á toppnum. Siggi var að klára færin sín ásamt því að leggja samherja sína upp hvað eftir annað (spurning að athuga hvort hann sé á lausu fyrir sumarið). Fótboltinn reyndi að klóra í bakkann undir lok leiks en án árangurs og komust þeir næst körfunni í stöðunni 21-16. Í lokin voru það Íslandsmeistararnir sem settu nokkur kvikindi og unnu stórsigur 25-17. Það var athyglisvert að sjá til körfustrákanna í leiknum. Samvinna, samleikur og leikgleði einkenndi leik þeirra og mættu fótboltastrákarnir læra mikið af körfunni í þeim efnum því það er greinilegt að þetta eru þættir sem fleyta liðum langt, jafnvel alla leið að Íslandsmeistaratitli...
Myndir: Jón Örvar
Liðin stilla sér upp. Þessi lengst til hægri er í körfunni...
Íslandsmeistararnir fengu blóm og hamingjuóskir fyrir leik.
