Knattspyrna | 30. apríl 2011

Pepsi-deildin - Oftast gegn KR, best gegn Blikum, slakast gegn FH

Nú þegar Pepsi-deildin er alveg að fara af stað er ekki úr vegi að kíkja aðeins á mótherja okkar í deildinni í sumar. Þegar fyrri viðureignir okkar við þessi 11 lið eru skoðuð kemur í ljós að við höfum oftast leikið við KR-inga í efstu deild. Rétt þar á eftir koma svo Valur og Fram. Þetta þarf ekki að koma á óvart enda hafa þessi gamalgrónu félög leikið í Íslandsmótinu frá upphafi. Næst á eftir í leikjalistanum koma svo ÍBV, Breiðablik og FH en þessi félög hófu þátttöku í Íslandsmótinu á eftir Keflavík. Næst koma svo Víkingar sem hófu reyndar leik skömmu eftir að Íslandsmótið hófst en hafa einhvern veginn sjaldnar verið samferða okkur í efstu deild en hin gömlu Reykjavíkurfélögin. Þar á eftir koma Grindavík og Fylkir sem léku fyrst í efstu deild um og upp úr 1990 og Þórsarar sem hafa leikið þar af og til frá árinu 1977 en áður léku Akureyringar sameinaðir undir merkjum ÍBA. Síðastir á listanum er svo Stjarnan sem lék fyrst í efstu deild árið 1990.

Þegar árangur okkar gegn öðrum liðum í Pepsi-deildinni þetta árið er skoðaður kemur í ljóst að okkur hefur gengið best gegn Íslandsmeisturum Breiðabliks í gegnum árin. Leikirnir gegn Blikum hafa einnig boðið upp á flest mörk, eða um 3.6 í leik en Keflavík og Breiðablik hafa aðeins einu sinni gert markalaust jafntefli í 44 leikjum. Þegar árangurinn er skoðaður áfram koma Víkingar og Fylkismenn á eftir Blikunum en þar munar mestu að Keflavík hefur aldrei tapað á heimavelli gegn Fylki í efstu deild. Langslakasti árangur okkar í efstu deild er gegn FH-ingum og þar á eftir koma Valur og ÍBV.

Eins og flestir vita er Íslandsmótið í ár það 100. í röðinni og er þeirra tímamóta minnst með ýmsum hætti. Keflavík hóf þátttöku á Íslandsmótinu árið 1956 og er því að leika 55. sumarið. Þar af eru 46 ár í efstu deild og leikirnir eru 735. Eins og sjá má á töflunni hér að neðan eru 537 þessara leikja gegn liðunum sem leika í Pepsi-deildinni í sumar.

Félög	Leikir	U-J-T	Mörk	Mörk mt.	Árangur	Fyrsti leikur
KR	89	32-27-30	124-125	1.4 - 1.4	51.1%	1958
Valur	87	29-26-32	131-132	1.5 - 1.5	48.3%	1958
Fram	84	31-27-26	123-115	1.5 - 1.4	53.0%	1958
ÍBV	61	24-12-25	94-101	1.5 - 1.7	49.2%	1968
Breiðablik	44	21-10-13	79-82	1.8 - 1.9	59.1%	1971
FH	42	10-14-18	57-68	1.4 - 1.6	40.5%	1975
Víkingur	40	20-7-13	63-49	1.6 - 1.2	58.6%	1970
Grindavík	28	12-7-9	41-36	1.5 - 1.3	55.4%	1995
Fylkir	26	11-8-7	33-36	1.3 - 1.4	57.7%	1989
Þór	22	8-9-5	40-33	1.8 - 1.5	56.8%	1977
Stjarnan	12	4-5-3	16-15	1.3 - 1.2	54.2%	1994
Alls	537	202-153-182	804-796	1.5 - 1.5	51.7%