Rúnar býður sig fram til stjórnar KSÍ

Rúnar Arnarson, fráfarandi formaður Knattspyrnudeildar Keflavíkur, hefur ákveðið að bjóða sig fram til stjórnar KSÍ.  Rúnar hyggst láta af embætti formanns deildarinnar á aðalfundi hennar í lok janúar.  Hann hyggst síðan bjóða sig fram sem stjórnarmaður Knattspyrnusambandsins á ársþingi þess þann 9. febrúar.  Rúnar hefur verið formaður Knattspyrnudeildar í tæpan áratug.  Starfsemi deildarinnar hefur verið öflug undir stjórn Rúnars, karlaliðið vann m.a. bikarmeistaratitil árin 2004 og 2006 og kvennalið félagsins lék til úrslita í bikarkeppninni árið 2007.  Á þessum árum hefur karlalið félagsins leikið í Evrópukeppnum félagsliða og fjölmargir leikmenn hafa reynt fyrir sér erlendis.  Það verður erfitt að fylla skarð Rúnars í stjórn Knattspyrnudeildarinnar en ljóst að reynsla hans mun nýtast vel á nýjum vígstöðvum, hvort sem það verður hjá KSÍ eða annars staðar.