Sigur á Álftanesi

Keflavíkurstelpur skelltu sér á Álftanesið miðvikudaginn 16. júní og unnu þar heimastelpur 2-1.  Óhætt er að segja að lokatölurnar gefi engan veginn rétta mynd af leiknum.

Keflavík var mun betri aðilinn strax frá byrjun en mörkin létu á sér standa.  Það var ekki fyrr en á 42. mínútu að fyrsta markið leit dagsins ljós en þá voru komin ein tólf færi!  En loksins kom fyrsta markið og þar var Nína Ósk á ferðinni með fallegt mark af um 22 metra færi.  Staðan í háfleik 1-0.

Það var svo um miðjan seinni hálfleik að okkar stelpur bættu við öðru marki eftir glæsilega sókn.  Enn var það Nína Ósk sem setti boltann í netið eftir að Fanney hafði sett hann í stöngina.  Sem fyrr segir var Keflavík betri aðilinn og áttu að vera búnar að klára þennan leik.  Það voru hins vegar heimastúlkur sem settu eitt í restina og þar við sat, Álftanes 1 - Keflavík 2.

Næsti leikur er á sunnudaginn kl. 16:00 á móti Þrótti á Valbjarnavelli.  Þar er á ferðinni uppgjör tveggja efstu liðanna í riðlinum.

Ein af fjölmörgum Keflavíkursóknum í leiknum.

Lagt að stað í sókn...

...sem endar með því að Nína Ósk kemur Keflavík í 2-0.