Sigur á Fylki í Landsbankadeildinni
Keflavík mætti Fylki í Landsbankadeild kvenna s.l. föstudag á Keflavíkurvelli við frábærar knattspyrnuaðstæður, völlur og veður frábært. Liðin mættust í VISA-bikarnum í júní á Fylkisvelli og bar Keflavík sigur úr býtum eftir mikinn baráttuleik þar sem úrslit réðust eftir vítaspyrnukeppni. Leikurinn á föstudag lofaði því góðu. Baráttan var allsráðandi frá fyrstu mínútu til þeirra síðustu og fór svo að Keflavík sigraði 2-1.
Lið Fylkis er vel mannað og spilar fínan bolta. Leikurinn byrjaði með mikilli baráttu um miðsvæðið en hægt og rólega náðu Keflvíkingar tökum á leiknum. Porca hefur verið duglegur að spila 4-3-3 og gerði breytingar á Keflavíkurliðinu eftir tapið gegn Fjölni. Hann færði Björg Ástu á hægri kanntinn, Unu Harkinn í djúpan miðjumann og Beth Ragdale í stöðu Bjargar í miðri vörn liðsins. Breytingin hafði góð áhrif á liðið og kom meiri ógnun á hægri væng liðsins fyrir vikið. Það kom þó ekki í veg fyrir að Fylkir næði forystunni gegn gangi leiksins þegar Anna Björnsdóttir skoraði á 27. mínútu, 0-1. Á 31. mínútu náðu Keflvíkingar góðri sókn upp vinstra megin og góð fyrirgjöf frá Donnu Chayne rataði beint á kollinn á Björgu Ástu Þórðardóttur sem skoraði með góðum skalla frá vítateigspunkti, 1-1. Fleiri urðu mörkin ekki í fyrri hálfleik þó oft hafi hurð skollið nærri hælum við mark Fylkis.
Seinni hálfleikur var líkur þeim fyrri, Keflavík meira með boltann en Fylkir ávallt hættulegar framávið. Á 53. mínútu var dæmd aukaspyrna á Fylki eftir brot á Vesnu Smiljkovic við vítateigshornið vinstra megin. Danka Padovac tók spyrnuna og skoraði beint úr með glæsilegu skoti í nærhorn Fylkismarksins, 2-1. Urðu þetta lokatölur í skemmtilegum baráttuleik þar sem bæði lið spiluðu til sigurs. Keflavík er eftir þennan leik í 3. sæti Landsbankadeildar þegar komið er að landsleikjafríi. Keflavík leikur næst 27. júlí gegn KR á KR-vellinum.
Keflavík: Jelena, Ester, Lilja, Beth (Anna), Donna, Björg Magnea, Una, Danka, Björg Ásta, Guðný (Bryndís), Vesna
Varamenn: Helena, Justyna, Rebekka, Eva.
Lilja Íris Gunnarsdóttir fyrirliði átti góðan dag með Keflavík.
Tveir af markaskorurum leiksins, Björg Ásta Keflavík og Anna Björnsdóttir Fylki.
(Myndir: vf.is)
