Sigur áhorfenda

Sigur Keflavíkur á KR á heimavelli hefur vakið verðskuldaða athygli knattspyrnuáhugamanna.  Árangurinn kemur mörgum á óvart, þó ekki þeim sem gleggst þekkja til liðsins.  Auðvitað sýnir það sterkan karakter liðsins í fyrstu tveimur leikjunum að vera undir í leikjunum en knýja engu að síður fram sigur.  Sérstaklega kom þetta sterkt fram í leiknum á móti KR.  Í upphafi móts getur allt gerst hjá ungu liði.  Allt farið á verri veg og ekkert sjálfstraust næst upp í liðinu.  Hjá Keflavík hefur það gerst að við vinnum báða leikina, sannfærandi og sýnum flottan fótbolta.  Þetta er fljúgandi start sem liðið mun nýta sér í næstu leikjum.  Það sem gerði sigurinn á KR svo sætan var að sýna okkar fólki, áhangendum Keflavíkur skemmtilegan fótbolta og óþrjótandi sigurvilja í 90 mínútur.  Fyrir liðið að fá 1400 manns á völlinn er eins og vera með tólfta manninn á vellinum.  Áhorfendur eiga heiður skilinn fyrir góða hvatningu á leiknum og leikmenn Keflavíkur eru stoltir af því að eiga svona áhorfendur.

(Mynd: Hilmar Bragi / Víkurfréttir)