Sigur en síðan tap í Futsal-úrslitunum

Ekki tókst okkur að verja Íslandsmeistaratitilinn í innanhúsboltanum en Keflavík spilaði um helgina á Íslandsmótinu í Futsal.  Á föstudagskvöldið sigraði liðið Aftureldingu/Hvíta Riddarann 14-4 í 8 liða úrslitum en spilað var í Garðinum.  Auðveldur sigur og liðið allt stóð sig vel.  Liðið var því komið í undanúrslit og mótherjinn Víkingur frá Ólafsvík.

Sá leikur var spilaður á laugardaginn á Álftanesi og var furðulegur í meira lagi.  Keflavík komst í 5-1 en Víkingar minnkuðu muninn og staðan í hálfleik var 5-3.  Seinni hálfleikur byrjaði herfilega hjá okkar mönnum og Víkingar skoruðu sex fyrstu mörkin í seinni hálfleik og því samtals átta mörk í röð.  Við vorum komnir 5-9 undir og eftir það var þetta erfitt á móti góðu liði Víkinga.  En að fá á sig átta mörk í röð, það á bara ekki að gerast hjá svo góðu liði sem okkar..  En svona er nú fótboltinn og fyrsta tap Keflavíkur í Futsal staðreynd.  Mörkin gerðu þeir Sigurður Gunnar Sævarsson 3, Magnús Sverrir 2, Guðmundur Steinars 2, Magnús Þórir 1 og Viktor Smári 1.

Fjölnir vann svo Víking Ólafsvík í úrslitaleik 3-2 og óskum við þeim til hamingju með titilinn.