Sigur í toppslag 3. flokks kvenna
Á mánudaginn tók 3. flokkur kvenna á móti liði Vals í toppslag A-deildar og var leikið á Iðavöllum. Það var augljóst að hvorugt liðið ætlaði að gefa eftir í þessari baráttu. Leikurinn fór nokkuð mikið fram á miðju vallarinns, liðin reyndu að ná þar yfirhöndinni til að geta stjórnað leiknum. Liðin sóttu nokkuð á víxl en án þess að skapa sér nokkur færi. Valur braut þó ísinn á 23. mínútu þegar þær fengu hornspyrnu. Eftir klafs í teignum hrökk knötturinn út til Bergdísar sem skaut í gegnum pakkann og í netið. Anna markvörður sá knöttinn seint og náði því ekki til hans, 0-1 Val í hag og fögnuðu þær vel. Það var þó stutt kátína því á 25. mínútu var réttilega dæmd vítaspyrna á Val. Helena Rós tók spyrnuna og afgreiddi hana af miklu öryggi neðst í vinstra hornið gjörsamlega óverjandi fyrir markvörð Vals. Áfram héldu liðin að sækja og var Keflavík mun nær því að bæta við marki, m.a. átti Helena gott skot á markið sem nánast sleikti utanverða stöngina. Þá vildu þær fá dæmt víti þegar boltinn fór í hönd Valsara eftir skot frá Evu og ,var nokkuð til í því. En lengra komust liðin ekki fyrir hlé og staðan 1-1.
Það voru ekki liðnar nema átta mínútur af seinni hálfleik þegar Birna Marín kom Keflavík yfir 2-1 með glæsilegu marki. Eftir gott spil á miðjunni barst boltinn til Hildar sem sendi hann strax út til hægri á Birnu. Hún var ekkert að tvínóna með boltann heldur afgreiddi hann í fyrsta og knötturinn söng upp í horninu hægra megin án þess að markvörður Vals ætti möguleika í hann. Nú tóku við erfiðar mínútur og Valur fór að sækja nokkuð stíft á okkur og við í leiðinni að detta aftar á völlinn. Stelpurnar voru of stressaðar á boltann, voru að losa hann alltof fljótt frá sér og fyrir bragðið datt allt spil niður. Á þessum fimmtán mínútna kafla vorum við heppnar að Valur náði ekki að jafna því færin fengu þær. Ýmist náði Anna að verja eða taka þær svo á taugum að þær skutu yfir eða framhjá. Stelpurnar náðu þó að klóra sig út úr þessu og koma sínum leik í rétt horf en lið Vals fór að pirrast yfir því að ná ekki að jafna leikinn. Það var bara gott mál, við réðum ferðinni á meðan. Sex mínútum fyrir leikslok innsigluðu svo stelpurnar góðan leik sinn með því að skora þriðja markið. Birna tók þá hornspyrnu og eftir mikið klafs í teignum náð Eva að pota kettinum yfir marklínuna og tryggja sigurinn, 3-1 Keflavík í vil.
Stelpurnar sýndu virkilega góða baráttu í þessum leik og leyfðu gestunum aldrei að spila sinn bolta, fyrir utan smá kafla í seinni hálfleik. Eins sýndu þær að það er engin tilviljun að þær eru efstar í A-deild því að það er hægt að fara langt á baráttunni, leikgleðinni og að spila undir merki Keflavíkur.
3. flokkur, Keflavík - Valur: 3-1 (Helena Rós Þórólfsdóttir, Birna Marín Aðalsteinsdóttir, Eva Kristinsdóttir)
Keflavík: Anna, Bergþóra, Fanney, Helga, Rebekka, Eva, Hildur, Helena, Birna, Karen S., Andrea, Karen H., Jóna, Sigrún, Kristín.
Myndir: Jón Örvar Arason
Andrea lítur um öxl.
Helena skorar úr víti.
Og markinu fagnað.
Marki Birnu fagnað.
Enn ástæða til að fagna.
... og fagna.
Hvar er boltinn?
