Sindri Kristinn æfði með landsliðinu

Það fór aldrei svo að við Keflvíkingar ættum ekki leikmann með íslenska landsliðinu sem leikur gegn Eistlandi á miðvikudag.  Landsliðið æfði í Garðinum á sunnudag og tók Sindri Kristinn Ólafsson þátt í æfingunni.  Fram kemur í frétt á fótbolti.net að tveir markverðir landsliðsins hafi verið uppteknir með félagsliðum sínum og því hafi vantað markvörð.  Sindri Kristinn var því fenginn til að hlaupa í skarðið.

Sindri Kristinn er 17 ára og leikur með 2. flokki Keflavíkur/Njarðvíkur.  Þrátt fyrir ungan aldur hefur hann nokkrum sinnum verið í leikmannahópi í Pepsi-deildinni i sumar og einnig í fyrra.  Sindri Kristinn hefur þrjá leiki með U-17 ára landsliði Íslands og hefur nú heldur betur bætt í bankann varðandi landsliðsreynslu.

Myndin að neðan er fengin að láni frá fótbolti.net og sýnir Sindra Kristinn og Hannes Þór Halldórsson landsliðsmarkvörð.  Myndina tók Hafliði Breiðfjörð.