Keflavík náði ekki að fylgja á eftir góðum sigri í síðustu umferð þegar liðið tapaði fyrir Þór í mikilvægum leik í 9. umferð Pepsi-deildarinnar.  Eftir jafna byrjun á Nettó-vellinum náðu gestirnir forystu þegar Chukwudi Chijindu skoraði um miðjan fyrri hálfleikinn og Jóhann Helgi Hannesson bætti öðru marki við í lok hálfleiksins.  Eftir það var á brattann að sækja hjá okkar mönnum og Sveinn Elías Jónsson bætti við þriðja marki Þórsara skömmu fyrir leikslok.  Arnór Ingvi Traustason lagaði stöðuna í blálokin en lokatölur 3-1 fyrir Þór og mikilvæg stig í súginn hjá okkar liði.

Eftir leikinn er Keflavík í 9. sæti deildarinnar með sjö stig.  Næsti leikur er heimaleikur gegn Breiðabliki á Nettó-vellinum sunnudaginn 14. júlí kl. 16:00.

Leikskýrsla á KSÍ.is

• Þetta var 25. leikur Keflavíkur og Þórs í efstu deild.  Þór hefur hefur nú unnið sjö leiki en Keflavík níu og níu sinnum hefur orðið jafntefli.  Markatalan er 44-39 fyrir Keflavík.
   
• Þetta var þriðja tap Keflavíkur gegn Þór á heimavelli í 13 leikjum.  Keflavík hefur unnið sjö leikjanna en þremur hefur lokið með jafntefli.  Þór hafði síðast unnið á efstu deild í Keflavík árið 1986 en síðan hafði Keflavík ekki tapað í sex leikjum gegn Þórsurum á heimavelli.
   
• Arnór Ingvi Traustason gerði þriðja mark sitt í deildinni í sumar.  Markið var 9. mark hans í efstu deild í 42 leikjum.
   
• Magnús Þór Magnússon og Halldór Kristinn Hallórsson urðu báðir að fara af leikvelli í fyrri hálfleik vegna meiðsla.  Einar Orri Einarsson kom inn á sem varamaður í seinni hálfleik og lék sinn fyrsta leik í sumar en hann hefur verið að berjast við erfið meiðsli í vetur og vor.
   
• Fyrir leikinn afhenti Þorsteinn Magnússon formaður Knattspyrnudeildar Kristjáni Guðmundssyni blómvönd í tilefni þess að Kristján var að stjórna Keflavík í 100. sinn í efstu deild.  Hann er fyrsti þjálfarinn í sögu félagsins til að ná þeim áfanga.  Þetta var 28. tapleikur Kristjáns, hann hefur hrósað sigri í 41 leik en 31 leikjanna hefur lokið með jafntefli.