Stelpurnar úr leik

Kvennaliðið okkar er úr leik í úrslitakeppni 1. deildar eftir tvö töp gegn ÍBV.  Liðin léku fyrri leik sinn á Sparisjóðsvellinum á laugardaginn og þar unnu Eyjastúlkur 4-0.  Lerato Kgasago skoraði tvö mörk og þær Elísa Viðarsdóttir og Kristín Erna Sigurlásdóttir eitt hvor.  Seinni leikur liðanna var svo í Eyjum í gær og lauk honum með 4-1 sigri heimastúlkna.  Edda María Birgisdóttir gerði tvö mörk fyrir ÍBV og Kristín Erna Sigurlásdóttir og Lerato Kgasago eitt mark hvor.  Nína Ósk Kristinsdóttir gerði mark Keflavíkur í leiknum en það var 27. mark hennar í 14 deildarleikjum í sumar.  ÍBV vann því viðureignina samanlagt 8-1 og mætir Þrótti R. í úrslitaleik deildarinnar en bæði lið leika í efstu deild að ári. 

Stúlkurnar okkar stóðu sig með prýði í sumar þó ekki tækist að ná lokamarkmiðinu.  Hafa verður í huga að við teflum fram ungu liði og því er framtíðin björt og það kemur sumar eftir þetta sumar...

Úr leiknum í Eyjum.  Fanney og Nína Ósk í baráttunni.
(Mynd: Sigfús Gunnar Guðmundsson / mbl.is)