Tap fyrir Stjörnunni
Keflavíkurstelpur sóttu lið Stjörnunnar heim í Landsbankadeild kvenna s.l. föstudag. Ekki sóttu stelpurnar neitt úr þeim leik og tapaðist hann 3-1. Leikið var á gervigrasvellinum í Garðabæ en þessi völlur hefur ekki verið okkur happadrjúgur í gegnum árin. Í liði Keflavíkur var nýr leikmaður sem var að spila sinn fyrsta leik, Beth Ragdale en hún kemur frá Crewe Alexandra. Beth er 22 ára varnarmaður og hefur verið fastamaður í liði Crewe.
Leikið var við nokkuð erfiðar aðstæður þar sem mikill vindur var og áttu stelpurnar okkar í mestu vandræðum að átta sig á aðstæðum. Keflavíkurliðið spilaði með vindinn í bakið í fyrri hálfleik og náði Vesna Smiljovic að skora fyrsta mark leiksins á 17. mínútu eftir laglega sókn. Stjarnan var greinilega tilbún að kljást við aðstæður og voru hættulegar í skyndisóknum sínum en Jelena Petrovic greip nokkrum sinnum vel inn í leikinn. Stjarnan náði að jafna leikinn á 37. mínútu en þá skoraði Inga Birna Friðjónsdóttir.
Í seinni hálfleik var sama baráttan í gangi og gekk Keflavíkurliðinu hálf brösulega að ná einhverjum tökum á leiknum og fór svo að Stjarnan setti tvö mörk á 59. og 83. mínútu. Það fyrra skoraði Inga Birna og Harpa Þorsteinsdóttir það síðara. Voru 3-1 lokatölur í þessum mikla rok- og baráttu leik. Keflavíkurliðið saknaði greinilega fyrirliða síns Lilju Írisar Gunnarsdóttur sem var erlendis þegar leikur var spilaður. Næsti leikur Keflvíkur er í VISA-bikarnum gegn HK/Víkingi miðvikudaginn 30. maí kl. 20:00 á Víkingsvelli.
Lið Keflavíkur: Jelena, Anna, Björg Ásta, Beth, Donna, Björg Magnea, Eva (Rebekka), Danka, Vesna, Bryndís og Guðný.
Varamenn: Dúfa, Justina, Ester, Karen.
ÞÞ
Vesna Smiljovic skoraði mark Keflavíkur.
