Þrír leikmenn gera samning við Keflavík

Í dag bóndadaginn 21. janúar skrifuðu þrír ungir og efnilegir leikmenn undir samning við Keflavík til þriggja ára.  Leikmennirnir eru Keflvíkingar í húð og hár, uppaldir hjá liðinu.  Þeir eru Ólafur Jón Jónsson, Þorsteinn Atli Georgsson og Guðmundur Árni Þórðarson.  Leikmennirnir eru allir nemendur í Fjölbrautaskóla Suðurnesja og fór undirskrift samninganna fram á sal skólans, en fjórði nemandinn Benedikt Birkir Hauksson er einnig samningsbundinn Keflavík.  Það var skemmtilegt andrúmsloft við undirskriftina en einhver hundruð nemenda samfögnuðu skólabræðrum sínum með þennan merka áfanga á þeirra ferli sem knattspyrnumanna með því að klappa ógurlega fyrir þeim að undirritun lokinni.  Í skólanum eru þeir að leggja drög að framtíð sinni og óskum við þeim alls hins besta á þeirri braut eins og við bindum miklar vonir við þá sem knattspyrnumenn framtíðarinnar.  Þessir leikmenn voru kallaðir til síðasta sumar og tóku þátt í leikjum meistaraflokks frá miðju sumri og enduðu með að verða bikarmeistarar á sínu fyrsta ári í meistaraflokki. Geri aðrir betur.  ási

Frá undirritun samninganna; Guðmundur, Ólafur, Þorsteinn
og Ási framkvæmdastjóri. (Mynd: Axel Sigurbjörnsson)