Þrír „Keflvíkingar“ í landsliðinu

Þrír fyrrum leikmenn Keflavíkur eru í landsliðshópi Ísland fyrir leikina gegn Ungverjalandi og Möltu í undankeppni HM 2006.  Þeir Haraldur Guðmundsson, Stefán Gíslason og Hjálmar Jónsson eru allir í hópnum að þessu sinni.  Það er sérstaklega ánægjulegt að Haraldur er nú valinn í íslenska landsliðshópinn í fyrsta sinn.  Við eigum hann auðvitað þó hann leiki nú með Aalesund í Noregi.  Norðmennirnir eru greinilega líka stoltir af stráknum og sögðu strax frá valinu á heimasíðu félagsins!  Halli hefur verið að leika feykivel í norsku deildinni og hefur fylgt eftir frábæru tímabili með Keflavík í fyrra sem endaði auðvitað með bikarmeistaratitlinum.  Við óskum strákunum öllum til hamingju með valið og vitum að þeir standa sig vel.

„Það er bara tímaspursmál hvenær þeir velja mig í þetta landslið“.
Halli spjallar við Samúel Örn eftir bikarúrslitaleikinn.
(Mynd: Jón Örvar Arason)