Tveir léku síðasta úrslitaleik

Eins og flestum er eflaust í fersku minni lék Keflavík síðast í úrslitum bikarkeppninnar fyrir sjö árum þegar liðið varð bikarmeistari eftir tvo hörkuleiki gegn ÍBV.  Af þeim leikmönnum sem léku þá leiki eru tveir enn í herbúðum okkar.  Hér má sjá hvernig liðið var skipað í seinni leiknum gegn ÍBV árið 1997 samanborið við liðið gegn HK í undanúrslitaleiknum á dögunum.

• Þeir Guðmundur Steinarsson og Þórarinn Kristjánsson leika enn með Keflavíkurliðinu.  Árið 1997 voru þeir nýbyrjaðir að leika með meistaraflokki enda var Guðmundur þá 17 ára og Þórarinn aðeins 16 ára.

• Aðrir leikmenn hafa sumir skipt um félag.  Bjarki Freyr Guðmundsson og Adolf Sveinsson léku með Stjörnunni í sumar, Gunnar Sveinsson og Snorri Már Jónsson léku með Njarðvík og þeir Eysteinn Hauksson og Gestur Gylfason með Grindavík.  Haukur Ingi Guðnason er í röðum Fylkismanna þó hann hafi ekkert leikið með í sumar vegna meiðsla og Jóhann B. Guðmundsson er atvinnumaður með Örgryte í Svíþjóð.

• Nokkrir sem léku ´97 hafa lagt skóna á hilluna en sumir hafa snúið sér að þjálfun.  Jakob Jónharðsson er aðstoðarþjálfari Keflavíkurliðins, Kristinn Guðbrandsson þjálfar 2. flokk Keflavíkur/Njarðvíkur og Gunnar Oddsson þjálfar Reyni í Sandgerði en hann þjálfaði einmitt Keflavík árið 1997 ásamt Sigurði Björgvinssyni.

• Anton Hartmanson var varamarkvörður í 97´-leiknum en hann tók við því hlutverki þegar Bjarki tók stöðu Ólafs Gottskálkssonar um mitt sumar en Ólafur gekk þá í raðir Hibernian.  Anton var þá orðinn 37 ára gamall.  Hann hefur lagt knattspyrnuskóna á hilluna en er enn tengdur knattspyrnunni á Selfossi þaðan sem hann kom til Keflavíkur. 

• Varnarjaxlarnir Guðmundur Oddsson og Karl Finnbogason hafa báðir lagt skóna á hilluna.  Karl hefur þó af og til leikið með Víði undanfarin ár og þjálfaði liðið ásamt Kristni Guðbrandssyni árið 2003.