Víkingur - Keflavík á miðvikudag

Keflvíkingar heimsækja Víkinga í 7. umferð Landsbankadeildarinnar miðvikudaginn 20. júní.  Leikurinn fer fram á Víkingsvelli og hefst kl. 19:15.  Fyrir leikinn eru okkar menn í 3.-4 sæti deildarinnar með 11 stig en lið Víkings er í 5. sæti með 8 stig.  Það er því mikið í húfi fyrir liðin að krækja í stig og styrkja stöðu sína í deildinni.  Dómari leiksins verður Jóhannes Valgeirsson, aðstoðardómarar þeir Einar K. Guðmundsson og Oddbergur Eiríksson og eftirlitsmaður KSÍ er Guðmundur Sigurðsson.

Keflavík og Víkingur hafa leikið 38 leiki í efstu deild, þann fyrsta árið 1970.  Keflavík hefur haft betur í viðureignum liðanna í gegnum árin og unnið 19 leiki.  Víkingar hafa sigrað 13 sinnum en sex sinnum hefur orðið jafntefli.  Markatalan er 61-49, Keflavík í vil.  Stærsti sigur Keflavíkur er 4-0 sigur árið 1979 en stærsti sigur Víkings var 3-0 sigur á Laugardalsvelli árið 1984.  Þrír leikmenn sem nú eru í leikmannahópi Keflavíkur hafa skorað gegn Víkingum í efstu deild; Þórarinn Kristjánsson hefur skorað ein fimm mörk og þeir Guðmundur Steinarsson og Stefán Örn Arnarson eitt hvor.

Liðin hafa leikið þrisvar í bikarkeppninni, árin 1975, 1981 og 2006.  Keflavík hefur unnið alla leikina og er með markatöluna 10-1.  Guðmundur Steinarsson hefur skorað tvö bikarmörk gegn Víkingum og þeir Jónas Guðni Sævarsson og Þórarinn Kristjánsson eitt hvor en þessi mörk voru að sjálfsögðu skoruð í 4-0 sigrinum í undanúrslitum VISA-bikarsins í fyrra.

Liðin léku að sjálfsögðu tvo leiki í Landsbankadeildinni í fyrra.  Keflavík vann fyrri leikinn 2-1 á Keflavíkurvelli þann 19. maí.  Hólmar Örn Rúnarsson kom Keflavík yfir en Davíð Þór Rúnarsson jafnaði áður en Stefán Örn Arnarson tryggði sigurinn á síðustu andartökum leiksins.  Síðari leikurinn fór fram í Víkinni 19. júlí.  Guðmundur Steinarsson kom Keflavík yfir en Viktor Bjarki Arnarsson jafnaði og lokatölur urðu 1-1. 

Úrslit í leikjum Víkings og Keflavíkur á heimavelli Víkinga hafa orðið þessi undanfarin ár: