1. deildin verður Inkasso-deildin
Knattspyrnusamband Íslands, Inkasso og 365 miðlar hf. undirrituðu í dag samning um markaðsréttindi Inkasso vegna næst efstu deildar karla (1. deild) og rétt 365 til beinna útsendinga frá leikjum deildarinnar fyrir árin 2016-2018 (3 keppnistímabil).
Samningurinn var gerður í nánu samráði við fulltrúa allra félaganna í deildinni. Þetta er í fyrsta sinn sem þessi réttindi eru seld með þessum hætti. Frá og með undirritun samningsins ber næst efsta deild karla nafnið Inkasso-deildin og mun gera það a.m.k. næstu þrjú árin.
Samningurinn felur í sér að 365 miðlar munu hafa einkarétt til sjónvarpsútsendinga frá öllum leikjum deildarinnar og með samningnum er stefnt að verulega aukinni umfjöllun um deildina og leiki hennar, sér í lagi með beinum útsendingum í sjónvarpi eða yfir internetið.
„Það eru spennandi tímar framundan og vilji Inkasso er að styðja enn fremur við bakið á íslenskri knattspyrnu, sem hefur vaxið og dafnað hratt seinustu ár. Næst efsta deildin býður upp á gæða knattspyrnu sem gaman er að fylgjast með, en því miður hefur deildin ekki fengið þá umfjöllun sem hún og knattspyrnuáhugamenn eiga skilið. Nú verður breyting á því. Farið verður í samstarf með 365 miðlum í útsendingu leikja, en 365 miðlar hafa lagt sitt að mörkum að styðja við bakið á íþróttaiðkun landsmanna og því er ánægjulegt að segja frá því að Stöð 2 Sport verður með tuttugu og tvær beinar útsendingar frá leikjum sumarsins í Inkasso-deildinni. Inkasso hvetur alla sem geta til að mæta á völlinn í sumar og styðja sitt lið af krafti og þeir sem eiga ekki heimangengt geta samt fengið sitt í gegnum allan þennan fjölda af beinum útsendingum. KSÍ á heiður skilinn fyrir fagmennsku og dugnað í þágu íslenskrar knattspyrnu enda sýnir það sig best með árangri kvennalandsliðsins undanfarin ár og íslenska karlalandsliðinu sem spilar á EM í Frakklandi í sumar.“ segir Georg Andersen framkvæmdastjóri Inkasso.
Jónas Þórhallsson, formaður knattspyrnudeildar Grindavíkur og einn af fulltrúum félaganna í Inkasso-deildinni hafði þetta að segja: „Það er okkur mikið gleðiefni að þessi samningur skuli vera í höfn, því með honum erum við að taka stórt skref í að auka vægi deildarinnar í umfjöllun um íslenska knattspyrnu. Félögin í Inkasso-deildinni vænta mikils af samstarfinu við Inkasso og 365, sem mun auka verðmæti deildarinnar og sýnileika hennar, og munu félögin í deildinni leggja sitt af mörkum til að samstarfið verði árangursríkt.“
„Þetta er virkilega spennandi verkefni og gott tækifæri fyrir 365 miðla til að leggja enn meira af mörkum til að lyfta íslenskri knattspyrnu og umfjöllun um hana á hærra plan.“ sagði Sævar Freyr Þráinsson, forstjóri 365.
Geir Þorsteinsson, formaður KSÍ, lýsti yfir mikilli ánægju með samninginn: „Þessi samningur mun gera okkur kleift að gera næst efstu deild karla mun sýnilegri en áður og Inkasso mun styðja félögin í þeirri vinnu að fjölga áhorfendum. Samstarfið við 365 á liðnum árum hefur verið afar farsælt og þessi samningur mun klárlega auka verulega umfjöllun um deildina til muna. Þetta er stórt og gott skref sem eykur verðmæti deildarinnar".
Frétt af KSÍ.is. Myndin með fréttinni er fengin að láni frá fótbolti.net.
