Fram - Keflavík á miðvikudag kl. 19:15

Keflavík heimsækir Framara á Laugardalsvöll miðvikudaginn 20. júní kl. 19:15 í 8. umferð Pepsi-deildarinnar.  Fyrir leikinn eru okkar menn í 9.-10. sæti deildarinnar með sjö stig en Fram er í því 11. með sex stig.  Bæði liðin eru því að berjast við þennan margumtalaða falldraug og vilja væntanlega bæði ná í einhver stig úr þessum leik.  Dómari leiksins verður Vilhjálmur Alvar Þórarinsson, aðstoðardómarar þeir Sigurður Óli Þórleifsson og Halldór Breiðfjörð Jóhannsson en eftirlitsmaður KSÍ er Egill Már Markússon.

Keflavík og Fram hafa leikið 86 leiki í efstu deild.  Sá fyrsti fór fram árið 1958 og lauk með 2-2 jafntefli þar sem Högni Gunnlaugsson og Hólmbert Friðjónsson skoruðu fyrir Keflavík.  Nokkuð jafnræði hefur verið með liðunum í gegnum árin; Keflavík hefur unnið 32 leiki en Fram 27 og liðin hafa skilið jöfn 27 sinnum.  Markatalan er 124-116, okkar liði í vil.  Stærsti sigur Framara var 5-0 árið 2009 og Keflavík hefur tvisvar unnið með 5 marka mun; 5-0 árið 1965 og 6-1 árið 2004.  Mesti markaleikur liðanna var þó 6-5 heimasigur Keflavíkur 1964 en það ár varð Keflavík einmitt Íslandsmeistari í fyrsta sinn.  Fjórir leikmenn sem í dag leika með Keflavík hafa skorað gegn Fram í efstu deild; Guðmundur Steinarsson hefur gert sjö mörk, Jóhann B. Guðmundsson þrjú, Magnús Þorsteinsson hefur gert tvö mörk og Arnór Ingvi Traustason eitt.

Liðin hafa leikið 11 leiki í bikarkeppninni og þar hafa Framarar betur.  Þeir hafa sigrað 7 sinnum en Keflavík 4 sinnum.  Markatalan er 13-17 fyrir Fram. 

Liðin mættust tvisvar í Pepsi-deildinni síðasta sumar eins og lög gera ráð fyrir.  Keflavík vann fyrri leikinn á Nettó-vellinum með einu marki gegn engu en það var Arnór Ingvi Traustason gerði markið.  Framarar unnu síðan seinni leikinn á Laugardalsvelli með sama mun þar sem Kristinn Ingi Halldórsson gerði eina mark leiksins.

Nokkrir leikmenn hafa leikið fyrir bæði lið þessi í gegnum árin.  Þar má nefna Ragnar heitinn Margeirsson, Paul McShane, Jón Gunnar Eysteinsson, Andra Stein Birgisson, Guðmund Steinarsson og Helga Björgvinsson. 

Úrslit leikja Fram og Keflavíkur á heimavelli Framara hafa orðið þessi undanfarin ár: