Fylkir - Keflavík á miðvikudag

Það verður toppleikur í Árbænum á miðvikudag þegar tvö efstu liðin í Landsbankadeildinni, Fylkir og Keflavík, takast á.  Leikurinn hefst kl. 20:00 á Fylkisvelli en þess má geta að leikurinn verður sýndur beint á Sýn.

Keflavík og Fylkir hafa mæst 12 sinnum í efstu deild; Keflavík hefur unnið fjóra leiki og Fylkir þrjá en fimm leikjum hefur lokið með jafntefli.  Markatalan er 15-17, Fylki í vil.  Liðin léku síðast saman í efstu deild árið 2002, þá vann Keflavík heimaleikinn 3-1 en tapaði 0-2 í Árbænum.

Liðin hafa einnig leikið 8 leiki í B-deild, fyrst 1981 en síðast 1992.  Þar hefur Keflavík sex sinnum farið með sigur af hólmi, Fylkismenn aðeins einu sinni en einum leik lauk með jafntefli.  Markatalan er 15-5, okkur í hag.

Keflavík hefur tvisvar mætt Fylki í bikarkeppninni og unnið báða leikina og markatalan er 4-1.

Tveir leikmenn sem nú leika með Keflavík hafa skorað gegn Fylki í deildarleik.  Guðmundur Steinarsson og Þórarinn Kristjánsson hafa báðir skorað tvívegis gegn Fylkismönnum í efstu deild.  Þess má geta að Haukur Ingi Guðnason hefur einnig skorað tvívegis gegn Fylki fyrir Keflavík en hann er nú í röðum Fylkismanna þó Haukur sé nú úr leik vegna meiðsla.

(Heimild: Íslensk knattspyrna / Víðir Sigurðsson)

Sjá upplýsingapakka um leikinn á heimasíðu KSÍ (pdf.-skjal).