Keflavík - FH á laugardag kl. 14:00

Eftir stutt hlé er komið að næsta leik í Pepsi-deildinni og að þessu sinni fáum við FH-inga í heimsókn.  Leikurinn fer fram á Nettó-vellinum laugardaginn 16. júní kl. 14:00.  Fyrir leikinn er Keflavík í 7.-9. sæti deildarinnar með sjö stig en FH er í 2.-3. sæti með 13 stig.  Dómari leiksins verður Gunnar Jarl Jónsson og aðstoðardómarar þeir Birkir Sigurðarson og Einar Sigurðsson.  Eyjólfur Ólafsson er svo eftirlitsmaður KSÍ.

Keflavík og FH hafa leikið 44 leiki í efstu deild, þann fyrsta árið 1975.  Keflavík hefur unnið 10 leiki, FH hefur unnið 19 en jafntefli hefur orðið í 15 leikjum.  Markatalan er 58-70, FH-ingum í vil.  Stærsti sigur Keflavíkur í leikjum liðanna er 6-1 sigur árið 1976 en stærsta tap gegn FH kom árið 1993 þegar FH vann 5-1 í Hafnarfirði.  Mesti markaleikur liðanna var á Kaplakrikavelli árið 2010 þegar FH vann 5-3.  Þrír leikmenn sem nú eru í leikmannahópi Keflavíkur hafa skorað gegn FH í efstu deild; Magnús Þorsteinsson hefur skorað fimm mörk og Guðmundur Steinarsson og Jóhann B. Guðmundsson hafa gert tvö mörk hvor.

Liðin hafa einnig mæst níu sinnum í bikarkeppni KSÍ, fyrst árið 1972 en síðast árið 2010.  Bæði lið hafa unnið fjóra leiki en einum lauk með jafntefli.  Markatalan er 12-9 fyrir Keflavík.  Guðmundur Steinarsson hefur gert tvö bikarmörk gegn FH-ingum og Haraldur Freyr Guðmundsson eitt.

Liðin léku tvívegis síðasta sumar í Pepsi-deildinni.  Fyrri leiknum á heimavelli okkar lauk með 1-1 jafntefli þar sem Matthías Vilhjálmsson kom FH yfir en Grétar Hjartarson jafnaði undir lokin.  FH-ingar unnu svo sinn heimaleik en þar gerði Atli Viðar Björnsson eina mark leiksins.

Nokkur tengsl hafa verið milli Keflavíkur og FH í gegnum árin og nú leika fjórir fyrrverandi leikmenn okkar með FH-ingum, þeir Gunnleifur Gunnleifsson, Hólmar Örn Rúnarsson, Guðjón Árni Antoníusson og Alen Sutej.  Þess má geta að Albert Guðmundsson og sonur hans Ingi Björn þjálfuðu bæði liðin á sínum tíma.  Meðal leikmanna sem hafa leikið fyrir bæði liðin eru Þorsteinn Bjarnason, Jón Þorgrímur Stefánsson, Kristján Hilmarsson, Valþór Sigþórsson og bræðurnir Daníel og Grétar Einarssynir.

Úrslit í leikjum Keflavíkur og FH í Keflavík hafa orðið þessi undanfarin ár: