Keflavík - Fram á mánudag kl. 19:15

Eftir stutt landsleikjahlé er komið að næsta leik í Pepsi-deildinni en mándaginn 10. júní fáum við Framara í heimsókn í 6. umferð deildarinnar.  Leikurinn verður á Nettó-vellinum í Keflavík og hefst kl. 19:15.  Fyrir leikinn eru okkar menn í 9. sæti deildarinnar með 4 stig en Fram er einu sæti ofar með 5 stig.  Það verður því hart barist um stigin og ekki má gleyma að Fram mætir til leiks með nýjan þjálfara.  Dómari leiksins verður Gunnar Jarl Jónsson, aðstoðardómarar þeir Frosti Viðar Gunnarsson og Sigurður Óli Þórleifsson en eftirlitsmaður KSÍ er Eyjólfur Ólafsson.

Keflavík og Fram hafa leikið 88 leiki í efstu deild.  Sá fyrsti fór fram árið 1958 og lauk með 2-2 jafntefli þar sem Högni Gunnlaugsson og Hólmbert Friðjónsson skoruðu fyrir Keflavík.  Nokkuð jafnræði hefur verið með liðunum í gegnum árin; Keflavík hefur unnið 34 leiki en Fram 27 og liðin hafa skilið jöfn 27 sinnum.  Markatalan er 131-116, okkar liði í vil.  Stærsti sigur Framara var 5-0 árið 2009 og Keflavík hefur þrisvar unnið með 5 marka mun; 5-0 árin 1965 og 2012 og 6-1 árið 2004.  Mesti markaleikur liðanna var þó 6-5 heimasigur Keflavíkur 1964 en það ár varð Keflavík einmitt Íslandsmeistari í fyrsta sinn.  Sex leikmenn sem í dag leika með Keflavík hafa skorað gegn Fram í efstu deild;  Hörður Sveinsson hefur gert fimm mörk, Jóhann B. Guðmundsson fjögur, Magnús Þorsteinsson þrjú, Sigurbergur Elísson hefur gert tvö mörk og Frans Elvarsson og Arnór Ingvi Traustason eitt hvor.

Liðin hafa leikið 11 leiki í bikarkeppninni og þar hafa Framarar betur.  Þeir hafa sigrað 7 sinnum en Keflavík 4 sinnum.  Markatalan er 13-17 fyrir Fram. 

Liðin léku að sjálfsögðu tvo leiki í Pepsi-deildinni í fyrra og vann Keflavík þá báða.  Fyrri leikurinn var á Laugardalsvellinum og þá vann Keflavík 2-0.  Frans Elvarsson og Guðmundur Steinarsson gerðu mörkin í þeim leik.  Seinni leiknum á Nettó-vellinum lauk með 5-0 sigri Keflavíkur en þar gerði Sigurbergur Elísson tvö mörk og Magnús Þorsteinsson, Hörður Sveinsson og Jóhann B. Guðmundsson eitt mark hver.

Nokkrir leikmenn hafa leikið fyrir bæði lið þessi í gegnum árin.  Þar má nefna Ragnar heitinn Margeirsson, Paul McShane, Andra Stein Birgisson, Guðmund Steinarsson og Helga Björgvinsson.   Nú leika tveir fyrverandi leikmenn okkar með Fram, þeir Bjarni Hólm Aðalsteinsson og Jón Gunnar Eysteinsson.

Úrslit leikja Keflavíkur og Fram á heimavelli okkar hafa orðið þessi undanfarin ár: