Keflavík - Fram á miðvikudag kl. 19:15

Keflavík tekur á móti liði Fram í 9. umferð Pepsi-deildarinnar miðvikudaginn 6. júlí og hefst leikurinn kl. 19:15 á Nettó-vellinum.  Fyrir leikinn er Keflavík í 8.-9. sæti deildarinnar með 8 stig en Fram er í því neðsta með tvö stig.  Það má því eiga von á hörkuleik; staða Framara er alvarleg og okkar menn vilja örugglega komast aftur á beinu brautina eftir fjögur töp í röð í deildinni.  Dómari leiksins verður Þorvaldur Árnason, aðstoðardómarar þeir Einar Sigurðsson og Eðvarð Eðvarðsson og eftirlitsmaður KSÍ er Jón Sigurjónsson. 

Keflavík og Fram hafa leikið 84 leiki í efstu deild.  Sá fyrsti fór fram árið 1958 og lauk með 2-2 jafntefli þar sem Högni Gunnlaugsson og Hólmbert Friðjónsson skoruðu fyrir Keflavík.  Nokkuð jafnræði hefur verið með liðunum í gegnum árin; Keflavík hefur unnið 31 leik en Fram 26 og liðin hafa skilið jöfn 27 sinnum.  Markatalan er 123-115, okkar liði í vil.  Stærsti sigur Framara var 5-0 árið 2009 og Keflavík hefur tvisvar unnið með 5 marka mun; 5-0 árið 1965 og 6-1 árið 2004.  Mesti markaleikur liðanna var þó 6-5 heimasigur Keflavíkur 1964 en það ár varð Keflavík einmitt Íslandsmeistari í fyrsta sinn.  Fjórir leikmenn sem í dag leika með Keflavík hafa skorað gegn Fram í efstu deild; Guðmundur Steinarsson hefur gert sjö mörk, Jóhann B. Guðmundsson og Haukur Ingi Guðnason þrjú hvor og Magnús Þorsteinsson hefur gert tvö mörk.

Liðin hafa leikið 11 leiki í bikarkeppninni og þar hafa Framarar betur.  Þeir hafa sigrað 7 sinnum en Keflavík 4 sinnum.  Markatalan er 13-17 fyrir Fram. 

Liðin mættust tvívegis í Pepsi-deildinni síðasta sumar.  Fyrri leikurinn fór fram á Njarðvíkurvelli og lauk með 1-1 jafntefli.  Kristján Hauksson kom Fram yfir en Magnús Þorsteinsson jafnaði.  Seinn leiknum lauk með 2-1 sigri Fram á Laugardalsvelli.  Halldór B. Jónsson og Almarr Örlygsson gerðu mörk Framara sem sáu reyndar alfarið um markaskorun í leiknum og gerðu eitt sjálfsmark.

Nokkrir leikmenn hafa leikið fyrir bæði lið þessi í gegnum árin.  Þar má nefna Ragnar heitinn Margeirsson, Paul McShane, Jón Gunnar Eysteinsson, Andra Stein Birgisson, Guðmund Steinarsson og Helga Björgvinsson. 

Úrslit leikja Keflavíkur og Fram á heimavelli okkar hafa orðið þessi undanfarin ár: